Vawikhat khelh tur a la awm miau a, champion tur chiangsa an la awm lo miau a, a chung club pahnih enkawltute’n ṭawngkam fing tak mai hmangin an inbei mek! Man Utd. Boss Sir Alex Ferguson chuan Queens Park Rangers Club chuan an champion theihna kawng an siamsak theih a rin thu a puangchhuak rup mai! Hetihlai hian City lam hian kum 44 hnua a vawikhatna atana English Champion nihve an tum nghet bur bawk. Mahse City tumpui tur QPR lam hian season thara BPL-a awm an la duh a nih chuan chak ngei ngei an mamawh ve tho si! Lehlamin Champion tumin an khelh a ngai bawk nen inkhel hi a ṭang viau turah ngai phawt mai teh ang. United lamin Sunderland an tum dawn a, an hneh ngei a rinawm bawk si. Tunah hian tu zawk nge Champion dawn tih engmah chiang a awm hauh lo mai. Season tawpa inkhel match tawp thlenga hetiang boruak awm hian Barclays Premier League hi mite ngaihven hlawh a ti zual hle. La Liga lamah Real Madrid an champion tawh a, Serie A lamah lah Juventus an champion tawh bawk, Bundesliga-ah Dortmund an champ tawh bawk nen, tun weekend chu England League sang ber hi khawvel inkhel ngaina mite ngaihven rawn a ni ta der mai.

Sir Alex-a lah chuan ngaihven ti tam tur tingin QPR lam a fuihpawrh thiam hle a, heti hian a ti, “He club pumpui kal zelna tur hi game khat te lek chauh awm hian a hril thui hle dawn a, he inkhelah hian Sparky hi khel thei nghe nghe sela ka ti ngawt mai” a ti deuh kher a, chu mai pawh a la ni lo,”Mark Hughes(Sparky) hian a hna hi a hre chiang hle a, City-in awm lo taka an ban kha a la hriat ngei a rinawm, mahse QPR players-te hian an damkhawchhuah theihna turin a tawp thlenga an ṭan theih ka beisei tlat a ni” a ti! Mark Hughes hi Manchester Uniter Striker hlui a ni a, heti hian a sawi “Kan va inkhelhna turah thil ṭha kan va nei thei a nih chuan chanchin ropui tak kan siam dawn a, anni chuan Champion an tum dawn a, keinin League-a inhamtan kan tum ve bawk dawn a, Club manager hna ka thawn ṭantirh aṭang khan fixture hi ka lo zirchiang tawh a, inkhelh tawp bera thil lo thleng tur hi a vanduaithlak ang nge kan tana thil ṭha tur zawk ni ang tiin ka rilru ka lo seng tawh ṭhin a, mahse tunah chuan league a kan la awm leh awm loh tur chu keimahni chauhin kan ti danglam thei tawh a ni”a ti.

City Boss Manchini chuan an champion theihna kawng hi ala khirh ve tho a ni tih hriain a ṭawng fimkhur hle a, “A la tawp lo. Karlehah point thum kan neih theih hi a pawimawh a ni. Theihtawp a kan ṭan a ngai leh dawn a, vawikhat inkhelh chiah a awm ta, QPR hi league aṭanga tlak an hlauh dawn vangin khelh an harsa dawn a, kan chak loh a ngai dawn a, team dang lakah innghahna engmah an nei tawh lo” a ti a ni.

Ferguson chuan an inkhelh whistle a tawp ruala vawi 20 an champion-na tur a nih theih a beisei a, “League a inkhelh hnuhnung berah ṭum thum lai kan lo champion tawh a, United player-te chu beisei an nih ang leh an tih ve tur reng a nih vangin kan(sunderland-ah) va kal ang a, beiseina sang tak nen kan va khel mai dawn a ni. A awlsam dawn lo tih chu ka hria, mahse kan tum dawn a ni” a ti.

Khawi club ber nge vannei in vanduai ta ang le?

• City an chak chuan kum 44 chhunga a vawikhatna atan an champion dawn.
• QPR an chak loh chuan League aṭangin an tla dawn.
• City an chak loh chuan an er ber club a vawi 20-an atan an champion dawn?

Tun aṭangin kan inhnial ṭan mai dawn nge kartawp kan nghak char char mai dawn le?