Red Ribbon pawh a vawrtawp kan thleng chho dawn chu a ni a, inkhel tuimite tan chuan a uihawmin a chhinchhiahthlak dawn hlein ka hria. Selna tam tak karah hmasawnna pawh hmuh theih khawpin a tam a. Tuntum pawh inkhel chanchin ngawr ngawr lo deuh ka’n post ang e.

Hmanni lawkah E.Lungdar team te chuan Civil Hospital, Aizawl-ah thisen an pek thu kan chhuah tawh a, an chhuanawm zia leh hetiang hi team dang te’n entawnin ti ve se tiin kan infuih a. Hei, Durtlang LC Team te chuan thil ropui an rawn ti ta ! Isua Krista kan tana a tawrhna ni ‘Good Friday’ denchhanin nimin tlai khan Durtlang-a home hrang hrang an tlawh a. Grace home, Synod Rescue home, Hmangaihna in, (Motherless Babies Home) Hermon Childrens home, Peace home, Blind School, Jericho khualbuk leh Agape Home te an tlawh kual a. Tawngtaina hun hman pahin Rs. 1000/- theuh an hlan.

Durtlang team te chuan mi thilphalte hnen atangin team pumpui leh mimal angin duhsakna sum an dawng hnem hle a, heng an sum dawn thinte hi anmahni duhdan a hmang mai lovin hmun khatah an chhunglut zel a, heng an sum dawn tlingkhawm atang hian midang an tanpui ta a ni. Vawiina post atan pawh hian a inhmeh riauin ka lo hria a. Good friday hi Isua Krista-in misual boral tur min chhandamna ni a ni a.  Hetianga hun pawimawh denchhana Durtlang team te’n midang an tanpui hi a Kristian rilru hlein ka hria, midang te paw’n i entawn zel ang u.

Hetiang ngaihdan hi team enkawltute sawihmuh ni lovin players te ngaihtuah chhuah liau liau a ni a. An tumdan hmasaah chuan Durtlang hospital-a thisen pek pawh a tel a, mahse inkhel leh zel tur anla nih avangin remchang lovin an hria a, pakhat zawk chauh hi an ti hlawhtling ta hrih a. Thisen pek hi chu final zawhah an tum ta zawk a ni.

Durtlang Captain Ruata chuan “Hei leh chen min hruaitu Pathian hian keimahniah hian phut let a nei ve ang tih hi kan pawmdan a ni a, kan inhmuhkhawm apiangin kan tawngtai thin a. He thil hi kan rilru ah a lian em em a. Kan game kan en a, min nawr tawm a, mangang taka kan awm laiin engtin tin emawni kan va ti goal leh mai thin a. Hei hi kan theihna vangah kan sawi ngam lo, Pathian vang a ni kan ti lo thei lo. Kan thiamna hmanga mite’n malsawmnaa min vur hi, pe chhuak tur kan ni tih hi kan rilru ah a lian hle a, kan tih theih tawk tlem mah se hetiang ti theia kan awm hi kan lawm a, keimahni pawh kan hlim a, kan inlungrualna pawh tunah chuan duhthusam a ni. Team Hlim ber kan ni ang tih hi kan in ring a ni” a ti.

ZoFooty chuan hetiang team an awm hi a chhuang tak meuh meuh a. Thilpek an pe nual tawh a, tournament zawh lama thisen pek an la tum thu han hriat leh phei hi chuan team entawn tlak ber pawl an ni kan ti lo thei lo. An inpekna hi a ropui hle a ni.

ZoFooty chuan naktuk lawka final khel tur Durtlang team te hi duhsakna a hlan a, an theih tawp chhuah turin a chah a ni. Tin, Chanmari LC team pawh theih tawp chhuah turin a chah ve bawk a, game mawi tak leh hmuhnawm tak ZoFooties te chuan hmuh i beisei ang.