Nimin piah April ni 14 a Livorno midfielder Piermario Morosini, inkhelh laia cardiac arrest vanga a boral thu kha kan hre theuh ang a. Lung lam that lohna avanga inkhelh laia footballer vanduaina tawk ta hi tun hnaiah mai pawh an awm ta nual mai. Thla hmasa maiah Bolton Wonderers player Fabrice Muamba pawh tiang deuh bawk khan inkhel laiin a lo tlu tawh a, mahse vanneihthlak takin a ni chu hei a la dam a. Tin, India ram ngeiah pawh Muamba heart attack tawh hma ni li maiah Bangalore club pakhat player Venkatesh chu inkhelh laiin a lo thi tawh bawk a. Khelmual chhunga footballer te nunna la tu he vanduaina tihbaiawm tak hi tun tum chu kan chhui zau dawn ani. Enge a chhan, invenna te a awm thei em, Mizoramah ngei pawh kan inkhelhna hmunah te engtin nge kan lo inven ve theih ang tih te kan sawi zau dawn ani.

Inkhelh laia footballer thi ta te

Cardiac arrest leh a kaihhnawih lung lam thalo avanga inkhelh laia thi hi footballer zingah an awm nual tawh a. Kum 2000 hnulam a chhinchhiah theihah ringawt pawh mi sawmthum chuang an awm tawh ani (Source). Chung zinga a lar zual te han tarlang lawk ila:

Heng thihna avang te hian FIFA leh UEFA pawhin August 2008 atang khan cardiac testing hi dan angin an lo phut tawh a. International match khel tur first team a tel player reng reng te chu cardiac test report an neih a ngai tawh ani. Premier League a player te pawh hian kum tin vawihnih test hi an nei thin. International Olympic Committee (IOC) pawhin test neih hi a phut tawh bawk.

Amaherawh chu India ramah erawh AIFF atanga State hrang hranga football association hotu te hian he thil hi an ngaihthah rei ta khawp mai a. Vawi thum lai India ramah thihna thleng tawh mahse, a veng tura hmalakna tak tak a la awm meuh lo a. A chhan ber chu club leh association hotuten players te hriselna leh he thihna laka an himna ngaih pawimawh nachang an hriat tawkloh vang ani ti ila kan sawi sual lo vang. Vekatesh a thih dan chungchangah pawh Ambulance tak ngial pawh a lo awm lova. Auto rickshaw a damdawiin an panpui chhung leh medical staff tel lova khelmual chhunga a leh reng chhung hun hlu tak ah khan a nunna kha chhanchhuah leh theih anih a beiseiawm ani. He thihna thlen hma deuh mai a thil thleng, Bolton Wanderers player Fabrice Muamba pawh kha cardiac arrest vang bawkin a tlu a, mahse anni zawngin medical staff leh hmanrua tha ber ber an nei a, a hun taka an chet avangin a nunna an chhanhim thei anih kha. Awle, tunah chuan cardiac arrest leh thihna a rawn thlen theih dan han sawi zau ila.

Heart attack leh Cardiac arrest

Mi tam takin kan sawi pawlh mai thin a, mahse heart attack leh cardiac arrest hi a in ang chiahlo a. Heart attack chu thisen kawng kha eng emaw vanga a lo inhnawh pinin a thleng thin a, hei hi ei leh in fimkhur loh leh thau lutuk vang te in a awm duh bik a. Cardiac arrest erawh chu thawklehkhata lung in hna a thawh theih loh tawp hi ani. Mi pangngai aia hrisel leh fit tha zawk infiammite zingah pawh a thleng thut thei a. Hei hi footballer te tana a hlauhawm zualna em em chu ani.

Sudden Cardiac Death (SCD)

Kan sawi tak thawklehkhata cardiac arrest rawn thleng hi Sudden Cardia Arrest (SCA) an ti a; Mizo ten lungphu chawl kan tih hi a ni mai awm e. Cardiac arrest hi chhan hrang hrang avangin a awm thei a. A lo thlen chuan lung a electrical signal a buai a, lung phu a mumal lo thin. Hei hi ventricular fibrillation an ti a, taksa thisen kal kual chu rawn buaiin oxygen supply a tlem phah a. Thluakin oxygen a hmuh tlem nghal avangin nikhaw hre lovin an awm thuai a, thaw pawh an la thei tawh lo thin. Minute 5 chhunga treatment pek loha an awm chuan thihna a thleng mai thin ani. He SCA avanga thihna hi SCD an tih chu ani.

Automated External Defibrillator (AED)

Cardia arrest vanga thihna hi a hun taka chet chuan Muamba case atang khan a pumpelh theih tih kan hre awm e. Hemi atana pawimawh ber chu hmanraw zangkhai te, Automated External Defibrillator (AED) an tih khawl hi ani. He khawl hi laptop tiat vel lek niin, a hman dan tur training nei lemlo tan pawh emergency a awlsam taka hman mai theih tura siam ani a. Ram changkang zawkah chuan airport, stadiums leh public buildings ah te fire extinguisher kan dah ang hian an dah ve mai thin. He khawl hian cardiac arrest nei mek chu a analyze ang a, a tul chuan electric shock na vaklo an awmah a pe dawn ani. Hei hian lung phu chawl tawh chu tih nun leh a tum dawn ani.

Miin cardiac arrest a neihin enge kan tih theih?

Miin cardiac arrest a lo neih chuan a hmasa in Doctor emaw Ambulance emaw koh vat tur ani. Amaherawhchu inkhelh lai ten kan thianpa cardiac arrest neiin lo tlu ta se, doctor emaw damdawithiam emaw lo thlen ngah hun chhung kha a uiawm lutuk. Kan lo tih ve theih chu CPR lo pek leh, a awm chuan AED khawl hmanga lo enkawl vat ani. Hemi atan hian Mizoram ah pawh kan football club te hian doctor emaw damdawi lam thiam tal hi chu an chhawr ve reng a tul ani. CPR pek leh AED khawl hman phei hi chu tu tan pawh thiam maitheih ani a, club tenau ah pawh coah te tal hi chuan CPR pek dan tal hi chu thiam se a tha viau ang.

India ram pawh a harh chhuak ve tan deuh em ni?

Thla hmasa March ni 21-a vanduai thlak taka Bangalore Mars footballer Venkatesh, khelmual chhunga a boral tak chungchang kha kan la hre theuh awm e. Kha thihna kha inkhelh laia medical staff leh ambulance te awm loh vang anih avangin Karnataka State Football Association (KSFA) thuneitu te demna thu pawh a ri nasa hle anih kha. Se bo hnua se kawng khar mai mah ni se, KSFA chuan Bangalore Football Stadium a medical facilities te chu thawm that anih tak thu tunhnai mai khan Press Conference kovin an puang ta a. Venkatesh a chhungte hnenah zangnadawmna cheng nuaih li pek anih thu an puang bawk.

Bangalore Football Stadium tana an hmalakna thar zingah chuan Ambulance thar an lei a, hetah hian rikrum thila nunna chhanhim thei khawl te a awm dawn ani. I-League inkhel zawng zawng atan Bangalore a hospital pathum nen inremna ziakin, hospital hnai ber HOSMAT hospital chu stadium atanga minute 3 leka hla ani. Tin, Bangalore Football Stadium a inkhel reng renga duty turin a ngetin Doctor an ruai bawk a. Heng zawng zawng aia pawimawh ber ni hial chu Automated External Defibrillator (AED) khawl an lei ta bawk hi ani. He khawl hi Rs. 95000 man niin, lungphu chawl vanga thihna laka nunna chhanhimna atana pawimawh ber ani hial awm e.

Mizoram ah enge kan tih ve theih ang le?

Mizoramah tunhnaiah football in hma a sawn hle a, tournament lian tham deuh deuh pawh kan huaihawt ta fo mai. Hengah te hian kan inkhel mite nunna venhim kawngah hian kawng danga hma kan sawn rual hian ke kan pen ve a ngai ani. Hemi atana rawtna awm thei te chu –

1. Ambulance duty: District, State level leh tournament lian tham deuh ah hi chuan Ambulance duty hi a pawimawh hle. Life support system changtlung, oxygen pekna khawl, AED leh hmanraw changkang a thuam ni ngei thei se. Venkatesh-a case atang khan Ambulance awmloh pawi theih zia chu a chiang hle awm e.
2. Automated External Defibrillator (AED): Mizorama football thuneitu sang ber MFA hian Automated External Defibrillator (AED) khawl hi kan la neilo anih chuan neih theih dan dap thei se. Khawi damdawiin nen te emaw tangkawp pawn, inkhel lian thamah chuan AED khawl hi chhawp ve zel ni thei se. Karnataka State Football Association pawn tlai khaw hnuah an lei ve ta a, keini pawn vanduaina kan tawh hmaa kan lo neih ve hi tih makmawh ani.
3. Heart screening test: Mizorama kan football club lian pahnih Aizawl FC leh Luangmual FC te tal hi chuan an la ti lo anih chuan an players te hi heart screening neih pui thei se. FIFA leh IOC te chuan hei hi an ngai pawimawh hle tawh a, kan Mizo footballer lar zualte pawh hian a khat tawkin test hi nei thei ngei se an duhsakawm.
4. First Aid leh CPR: Khawi veng leh khaw kilkhawr pawh ni se, football team/club inti pha chin chuan basic first aid leh CPR (CardioPulmonary Resuscitation) pek dan tal thiam tu emaw neih tum tur ani. Coach leh Manager te hian zir mai theih ani.
5. Mimal hriselna uluk: Footballer reng rengin kan hriselna ngai pawimawh ila, meizial zuk, zu in nasat lutuk leh ei leh in hrisello lak atang tein inveng ila. Chhungkua a lung lam thatlohna nei tawh kan awm phei chuan heart diseases laka kan him nan kan hriselna kan uluk lehzual a ngai ani. Damdawiina in check up thin te pawh a ngai ang.

Awle, cardiac arrest vanga thihna thleng chanchin kan sawi avang hian footballer ten kan lo hlauh em em a, inkhelh te kan hlauh phahna tur ani lova. Damdawi tha leh enkawlna tha ber hnuaiah pawh nunna chu a chan theih a, mahse a hun taka hmaraw dik tak nena enkawl anih chuan cardiac arrest vanga thihna hi a pumpelh theih ani.  Amaherawhchu hmanrua leh enkawlna mumal kan neih miau loh chuan he vanduaiana hian min rawn nan ve hlauh zawngin hmingchhiatna leh inchhirna namenlo chauh lo chu hmabak kan nei lo. India ram State dang anga a pawi tur a pawi tawh hnua inzir lovin, State dang te entawn tlak ni turin football lama kan hotu te hian footballer te hriselna leh himna lamah hian an ngaihtuahna seng zual se tih hi kan sawi tum ber ani.

Chhiartu ten rawtna dang te kan nei em le?