Nikum November thla khan Manchester United chuan India ramah soccer/football school an rawn din thu kan tarlang tawh a. A chhiar leh duh tan HETAH hian kimchang zawkin a chhiar leh theih a ni.

He Manchester United Soccer School (MUSS) hi January ni 30 khan Cooperage ground, Mumbai-ah hawn a ni a. Nimin piah (February ni-8) khan Manchester United players hlui pahnih – Denis Irwin leh Quinton Fortune te chuan school naupang te hi training an rawn neihpui a ni. Denis Irwin hi Manchester United full back hlui niin 1990-2002 chhung khan United-ah hian a khel a, kum 12 chhung zet a khel a ni. Fortune ve thung hi chu midfielder niin 1999-2006 chhung khan United-ah hian a khel a ni.

MUSS Head coach, Chris O’Brien chuan “ Naupang te hi Manchester United Academy-a training an pek thin anga train an ni dawn a. Kar khatah vawi nga training kan pe anga, tunah chuan dribbling kan zirtir phawt dawn a. He hian rah tha a chhuah kan ring a ni. Dribbling hi module khat (kar nga chhung) kan zirtir phawt ang” a ti a. Tin, Head coach chuan “ Physical fitness leh diet kan ngai pawimawh hle bawk a. Theory class pawh a awm dawn a, theory hi practical tluk zeta pawimawh a ni” a ti bawk.

Module hmasa ber (kar nga chhung) training man hi mi pakhat tan Rs.12,600/- a ni a, he school hi Western Indian Football Association nen a inthunzawm bawk a ni. Module hmasa ber atan hian naupang 300 chuang zet te chu hming pe lut an ni a, school hian naupang fee pe thei lo te chu a zawngchhuak anga, training pek dan a zawng dawn bawk a ni.

Western India Football Association (WIFA) CEO Henry Menezes chuan “Cooperage ground hi siamthat mek a ni a, season lehah chuan siam zawh hman beisei a ni a. A theih chuan I-League match te pawh he ground-ah hian khelh a ni dawn a, home team Air India leh Mumbai FC te paw’n Balewadi Sports Complex, Pune-ah home match an khelh phah a ni” a ti a.

Cooperage ground-ah hian artificial turf phah a ni. Tunah hian naupang te chu field sir, hmar lama artificial pitch-a floodlights hnuaiah training neih pui an ni a. Menezes chuan “Chhim lamah pawh hian artificial pitch siam leh thuai a ni anga, naupang ho training-na ami tur turf phah man hi Manchester United chuan a tum vek a ni” a ti bawk.