Tun hnaia Great Britain Olympic Squad tur thlan zingah David Beckham a tel ve lo tih kan hria, Major Leaque Soccer (MLS) lamah Beckhan tan chanchin duhawm loh a thleng leh ta.

Tun inrinni kalta khan LA Galaxy leh San Jose ten Leaque match khelin, LA Galaxy hi 4-3 in an chak lova, he match khelh anih lai leh hun tawp hnua David Beckham-a nungchangin sawi zui a hlawh hle a. A tawpah Major Leaque Soccer lam hotu (Disciplinary committee)-in thutlukna an siam a, chu an thu tluknaah chuan “David Beckham hi match khat khel thei lo tura hrem leh pawisa chawitir tur tih a ni” tih a ni a.

David Beckham-a’n hrem a tawhna chhan ber hi inrinni kaltaa San Jose nen an inkhelh tum hian, hun khawhral thu hlaah San Jose player pakhat chu ball-in a pet khum a, hei mai bakah inkhelh zawh; hun tawp hnuah San Jose players thenkhat te nen an inhnial buai zui leh a ni.

Hetih lai hian a pawisa chawitur zat erawh sawilan a ni lo thung. MLS Disciplinary Committee chuan thuchhuah siam nghalin “Beckham-a khawsa zia hi amakin hriatthiam theih chi rual anih loh bakah, mipui tam tak hmaah MLS hmel ati mawi lovin ati zahawm lohva, chuvangin kan thutlukna hi a pawm angai a, Pathianni tlaia Chicago Fire nen an inkhelh hunah he kan thutlukna hi a zawm ngei a, a khelh loh kan beisei a ni” anti bawk.