Euro 2012 tan nan kar ruk vel chauh a awm tawh tihin France, Poland, Holland, Portugal leh Croatia te chuan an kawr (jersey) hak tur an pholang ta. He kawr te hi Nike siam niin a bik taka thiamna sang zawk nen a siam ni in, player te tan hak a nawm bakah a ‘environmentally friendly’ ni in sawi a ni.

Robert Lewandowski (Poland), Yann M’Vila (France), Cristiano Ronaldo (Portugal), Wesley Sneijder (Holland) and Luka Modric (Croatia) ten an ram kawr an ha

Poland: Euro 2012 thlengtu ram pakhat zawk Poland kawr hi an ram flag mil a design a ni a. An ram flag a mu (eagle) lem a chuang nalh hle a. He kawr hi a thlengtu an nihna angin an chetthatpui hle a rinawm.

France: Tuna France kawr hak tur hi sipai uniform entawn a siam a ni a. A kawr nghawng lai hi a mawi lai ber leh a dangdaina ni in a lang. A kawr nghawng hnung ah hian rawng sen in ‘Nos differences nous unissent’ (Our differences unite us) tih mawi takin a inziak a. Hei hian France ramah mi hrang hrang ang khatin hlim takin an chengho thei tih khawvel hriatah an puanchhuahna a ni.

Portugal: An kawr hak tur hi chu a hmaa an hak nen a danglam tamlo hle a. A kawr nghawng chhungah hian lawng hmanrua (navigation instrument) lem a chuang a. Hei hian khawvel a lawng hmang a ram zawngchhuak hmasa leh hmuchhuak hnember hnam an nihna a lantir a. Kum 500 chuang he entirna hi chhuang takin Portugal hian a lo hmang tawh a ni.

Holland: Kum dang ang bawkin Holland chuan serthlum rawng an ha dawn a. Amaherawhchu, 1904 a an kawr hak entawn in veilam ah design thar, kum dang anglo takin a awm dawn a ni. Kawr nghawng chhungah hian ‘Nieuwe Meesters’ (New Masters) tih a inziak a, hei hian 17th century laia Dutch lemziakthiam ho chawimawina a lantir a. He chawimawina hian tuna Holland player te hi nasa taka a fuih theih beisei a ni.

Croatia: Suker te hunlaia Croatia in khawvel an rawn barakhaih laia an kawr ang bawk kha tlem a changkang deuh zawkin an rawn ha leh dawn a. Kawr nghawng chhungah hian ‘Uvijek Vjerni’ tih a inziak a. A awmzia chu ‘Always loyal’ tih a ni a. Hei hian Croatian te an football lakah an rinawmzia a lantir a ni.

Thiamna thar leh sang zawk nen a thui he kawr ah hian player te tana hak nuam leh an thlan a chhuah pawh a harsatna an tawh lohna turin kua (holes) a awm dawn a. Eng tiang takin nge player te a tanpui dawn tih chu tournament zawh a an thlirletna lamah te pawh a ai chiangin a hriatthiam theih ang.