England-a football thuneitu sâng, The Football Association chuan, Pathianni zana Arsenal leh Manchester City intum ṭuma Arsenal player Alex Song tlawhtu Mario Balotelli chu a hrem belh dawn lo tih thuchhuah a siam. Balotelli hian red card a hmuh avangin hremna chu a tâwk tho ang a, mahse Alex Song a tlawh avanga match 3 hrem theih a nih chu a pumpelh ta a ni.

Retrospective action:

A sapṭawng chuan “Retrospective action” an ti mai a. Football field chhunga thil thleng, hrem ngei tur nia lang, match official ten an hmuh loh avanga an hrem loh, inkhelh zawha ennawn a nih hnua an hrem tak sawina a ni ti ila a dik awm e. Hetiang hremna hi match official zinga tumahin field chhunga ‘foul’ an hmuh loh chauhin lekkawh theih a ni a, referee, assistant referees leh fourth official ten an hmuh loh vek chauhin he dan hi hman theih a ni. Balotelli-a’n Song a tlawh khan referee in a hmu a, engtiang chiaha ‘foul’ nasa nge a nih hmuchiang lo mahse, a hmuh hrim hrim avangin ‘retrospective action’ hi lekkawh theih a ni ta lo a ni.

He hremna hi a tlangpuiin ‘off the ball’ a thil thleng, match official zinga tumahin an hmuh loh chauhin an lekkawh tlangpui a. Referee in thutlukna a siam tawh tihdanglam leh nan hman theih a ni lo a ni.

He dan hi FIFA pawmpui niin, field chhunga hrem nghal theih thil thleng, official ten an ‘hmuh loh’ vanga hrem loha awm mai tur hremna tur a nih thu leh, England-a football stakeholder zawng zawngin he dan hi an pawm thu FA official website chuan a tarlang bawk a ni.]

source: thefa.com