Independence Day Celebration Invitation Football Tournament khelh chhunzawm leh a ni a. Vawiin hi ni 5-na a ni a, match hnih bawk a awm leh a. Match hmasa zawkah Aizawl FC in 3-1 Dinthar FC an hneh a, Aizawl FC tana goal thuntute hi Lalthanpuia (Papuia), Brandon VL Remdika leh Zoremtluanga te an ni a. Dinthar FC goal awmchhun hi Laldanmawia thun a ni thung. Aizawl FC hian match hnih khelhah point 6 an hlawhchhuak a, Dinthar FC erawhin match thum khelhah point 4 an hlawhchhuak thung. Match hnuhnung zawkah Mizoram Police in 1-0 in ONGC, Mumbai an hneh a. Goal awmchhun hi Vanlalhriata thun a ni. Tihian MRP hian match thum khel tawhin point 7 an hmu a, ONGC erawhin match hnih khel tawhin an la chak lo ve ve a, point an la hmu lo a ni.

First match : DINTHAR FC 1-3 AIZAWL FC
(Laldanmawia 55′) ; (Lalthanpuia 7′) (Brandon V.L Remdika 86′) (Zoremtluanga 90+2)

Dinthar FC hi I-League pawh khel tur ONGC hneh zo hlim an ni a, an phur a, Aizawl FC pawh hneh an tum a, an hneh pawh an inring hle a ni. Chutih rualin players neitha Aizawl FC hi tun hnaia club dinthar leh ni mah se MFA First Division Champion Dinthar FC inhnehtir an tum lova, match hmasa berah Reitlang FC 3-0 ngawtin an sawp bawk nen an phur thar a, ni 3 ngawt hahchawlhna hun an nei a, chak an tum hle a ni.

Tute nge khel?
Dinthar FC : T.Mawia(Keeper), Ronald (Ronald), Chhana(Captain), Ramnuna, Zautea, Biaknunga (Chhaia) (Liansanga), Tluanga, Danmawia, Kca, Mawitea, Samuela
Aizawl FC : Isaac (Keeper), Ricky, Dina, Zohmaa, Thomas, Zorema, Rina (Valpuia), Johny, Brandon, Sawmtea(Captain) (Zirtea), Papuia

Inkhel chanchin
Inkhelh tantirh atang game a tang nghal a. An innawr tawn a. Minute 7 na lekah AFC lamin an ti goal nghal a. Half way line pelh deuh hret ah left back Ricky-a’n freekick atang ball a vawrh lut a, Papuia’n a lo head goal a, Aizawl FC lamin hma an hruai der a. Dinthar FC lamin an nawr let ve nghal a. Mahse clear chance hmuh tur a awm lova. Midfielder nei tha ve ve an ni bawk a, midfield battle a hmuhnawm thei khawp mai. Aizawl FC rawlthar Brandon-a che vel a hmuhnawm a, bench atanga rawn lut Zirtea paw’n chance a nghah khawp mai.

Dinthar FC lamin Samuel-a, Danmawia leh Mawitea te hmangin an nawr a, mahse Zohmaa leh Laldina an su tlang thei meuh lova. Dinthar midfielder Tluanga leh Kca te chevel pawh hmuhnawm khawp mai. Dinthar FC hi ONGC hneh thei annih avangin mipuiin an beisei sang tawh a, an tangulh deuh a tih theih. An defender tha Ramnuna leh Chhana te an khel tha a, an si phurh sut an tum na lutukah AFC attacking players tlan chak te an dang hneh lo leh thin a, an lamah goal a luh belh phah tep a ni.

Minute 55 naah Dinthar FC midfielder tha Tluanga’n ball tha tak la lutin Danmawia tan a cross lut a, Danmawia hian a lo head goal a. Thawm a tha kher mai. 1-1 a ni a, Dinthar FC an rawn phur thar a, Aizawl FC paw’n draw an tum lova, pet goal leh an tum hle a ni. An in draw mai dawn emaw tih laiin minute 86 naah Aizawl FC midfielder tha Valpuia’n rawlthar Brandon-a tan ball tha tak pein Brandon-a hian a lo pet goal a, Aizawl FC fans leh players te an sapatal a ni ber mai. Brandon-a hi AFC Academy chhuak a ni nghe nghe. Injury time-ah Brandon-a hian box chhungah Dinthar FC defender te bumin ball a la lut a, Zorema a pass a, Zorema hian a lo pet goal a, hun a tawp zui a, 3-1 in Aizawl FC an chak ta a ni.

Sawi zui ang
Dinthar FC hian players an nei tha a, an fitness pawh a tha, an inpuahchahna pawh a tha a. Chutih rualin vawiinah kha chuan duh angin an khel tha lova, an defender tawnhriat ngah pahnih Chhana leh Ramnuna te’n AFC rawlthar Brandon-a leh Zorema an ‘check’ hneh lo hle a ni. Chutih rualin midfielder an nei tha a mahse vawiinah erawh an midfielder te’n duh angin ball an ‘hold’ thei lova, ball an in pass nasa lova, long ball an uar a, AFC defender te an sutlang zo leh si lova, duh angin an che thei lo a ni. An chak loh avangin an chhe ta e tihna a ni lo, game khelh chhiat ni leh vanduai ni a awm ve a, khelh leh hunah erawh chak an tum hle ang.

Aizawl FC players leh coaching staff te an fakawm a, a bikin players te’n an khel tha a, an game plan a fuh a, an chak ta a ni. Dinthar FC defender te an tha tih an hria a, a sir atang an nawr a, an tifuh a, goal an thun theih phah a. An players tha Albert, Rammawia leh Francis-a te an inhliam chungin an talbuai lova, players an neithat an hmang tangkai hle a ni. Captain Sawmtea a inhliam a, V.Captain Zirtea a rawn lut a, Sawmtea awm loh pawh lang lo khawpin an kheltha a. Defender Laldina leh Zohmaa te an khel tha a, Dinthar Striker Danmawia leh Samuel-a te tan chance a siamsak tha duh meuh lova. Inkhel enin Aizawl FC in chak an phu a, an chak zawk a ni.

Second match : ONGC, MUMBAI 0-1 MIZORAM POLICE
(Vanlalhriata 39′)

ONGC, Mumbai hian an match hmasa berah Dinthar FC an hneh lova, chak loh zawn an duh lova, match hmasaa khel players 3 ngawt an thlak a. Chak an tum hle a ni. Durand Cup la khel tur an nih avangin in enchhin nan an hmang deuhva, an star players thenkhat lo kal lo bawk nen an players fit lo te inkhelh fit tir leh players naupang te enchhin nan an hmang a ni. Mizoram Police hi star players rual awmkhawmna tih ngam a ni a. Tawnhriat ngah leh Mizoram tana vawi duai lo inkhela lo fehchhuak tawh te an ni hlawm a. An match hmasa pahnihah point 4 an hlawkchhuak a, match hmasa bera an draw Dinthar FC hneh hnu, ONGC hi hneh ve an tum hle ni.

Tute nge khel?
ONGC, Mumbai : Prasenjit (Keper), Abraham Lalrinngheta, Kamal, Rajib, Chhuantea (Pahoon), Surabudin, Kunal, Muanpuia (Captain), David Rinmuana, Kailash (Tariff)
Mizoram Police : Hriata (Keeper), Itana, Ruata, Hruaia (Apuia), Ropuia, Nunmawia, Hriata, T-a, Sama Hnamte (Captain), Biaktea, Valpuia

Inkhel chanchin
ONGC, Mumbai hian chak loh zawn an duh lova, champion an tum thu ZoFooty an hrilh a. I-League club-in khel pha lo a zawna hneh an duh lova, an tang hle a ni. Mizoram Police lam paw’n Dinthar FC hneh theih chu hneh ve an tum a. Coach Joseph-a’n Chhuantlinga bench-ah thut tirin a aiah Hriata a dah a, midfield laiah pathum a dah a ni. Fakzuala lachhuakin Nunmawia a dah bawk a, JS-a aiah Ropuia a dah bawk a ni.

Inkhelh tan atang game a tang a. Match hnuhnung zawk a ni bawk a, boruak a dai tawh a, players te pawn khelh nuam an ti a, an game pawh a rang khawp mai. Mizo players 4 te’n an start vek a. Mizo tlangval Muanpuia bawk Captain a ni leh a. An intum tawk a. Clear chance hmuh tur a vang a. ONGC lamin an striker Kailash Patil hmangin chance an nei zeuh zeuh a, mahse a fit tawk lova, a finishing a chhe deuh bawk nen a pet goal thei meuh lo a ni. MRP lamin Valpuia leh Biaktea hmangin an nawr a, mahse ONGC defender te an paltlang zo meuh lo a ni.

Minute 39 naah MRP lamin corner atang goal an thun a. Captain Sama Hnamte-in corner petin Chhuantlinga aia lut midfielder Hriata’n mawi lutukin a head goal a, a class a sang hle. Lammual-ah thawm a tha kher mai ! Coach Joseph-a’n squad a siksawi fuh khawp mai. ONGC lamin an nawr a, freekick atang bar te an pet per a. Second half-ah ONGC lamin an nawr deuh a mahse Mizo defender tha Ruata leh Hruaia te an su tlang zo meuh lo a ni. MRP lam hi counter attack-ah an hlauhawm thei hle. Goal dang a luh belh lova, Mizoram Police-in 1-0 in ONGC, Mumbai an hneh ta a ni.

Sawi zui ang
Nimin piah lam khan Dinthar FC-in I-League khel tur ONGC, Mumbai te hi 2-1 in an lo hneh tawh a. Vawiinah MRP in ONGC hi an lo hneh leh a, hei hian a entir chu Mizo te hi kan chhe lova, kan thiam ve tawk a ni tih hi a ni. Exposure tha leh league mumal kan neih loh a tih theih. Tunah MPL te kan nei chho anga , Mizo club te hian I-League kan la khel thuai dawn a ni. ONGC lam hian an foreign players leh star players te chhawr lo mah se tuna khel te ho hi players chhia an ni lova, Durand Cup atana inpuahchah an nih angin I-Day tournament pawh hi an la serious hle a ni. Inhliam an hlau em em a, an indim hle a ni. Mizo players 4 awm te an khel chhe lova. Right back Abraham-a a khel tha tluan a. Tin, Midfielder David Rinmuana leh Muanpuia te pawh an khel tha hle a ni. David-a phei chuan goal bar te a pet per nghe nghe.

Mizoram Police players te hi an achievement leh an profile en dawn ila chuan an ni team aia tha tur hi a chawhrualin an awm kherin a rinawm loh. Star player rual tih ngam an ni. Match hmasa berah beisei an pha lova, match hnih naah an rawn khel tha chhova , an match thum naah phei chuan khel tha tawk tak an ni. Match fitness an nei chho tan a, hetianga an khelh phawt chuan players an nei tha a, an fitness a tha bawk a, an chesual anih loh chuan an champion a rinawm hle a ni. Players leh coaching staff te an fakawm a, chak an phu a ni. Tihian Mizoram chhungah I-League club hneh thei pahnihna an ni bawk !

* Image from Joszef Ralte Kawlni