Independence Day Celebration Invitation Football Tournament khelh chhunzawm zel a ni a. Vawiin hi ni 7-na a ni a, match hnih bawk a awm leh a. Match hmasa zawk hi AR Lammual-ah khelh a ni a, match hnihna erawh rokhawlhna a awm avangin RG Stadium, Mualpui lamah khelh a ni thung. Match hmasa zawkah ONGC, Mumbai in 1-0 in Reitlang FC, Reiek an hneh a. Goal awmchhun hi Tariff Ahmed thun a ni. Match hnih naah Aizawl FC leh Mizoram Police 1-1 in an in draw a. Goal thuntute hi Laldinpuia (own goal) leh Michael Lalremruata an ni.

Tihian, Group A atang Aizawl FC leh Mizoram Police-in semi-final an lut a ni. Aizawl FC hian match 3 khelhah point 7 an hmu a, MRP hian match 4 khelhah point 8 an hmu thung. Dinthar FC hian an match hnuhnung berah Reitlang FC an tum dawn a, an chak anih chuan Aizawl FC nen point 7 an hmu ang a, head to head-ah Aizawl FC an hneh si lova, match 1 la awm mah se an tla ta tho a ni. Reitlang FC leh ONGC, Mumbai pawh vawiin inkhel result vangin an tla fel ve bawk.

First match : REITLANG FC 0-1 ONGC, MUMBAI
(Tariff Ahmed 47′)

ONGC, Mumbai hian match hnih khel tawhin an tumpuite an la hneh lo ve ve a. Tournament tan hmaa mi takin champion tura an lo rin ONGC team hian tunah chuan point box nih loh an tum tawh a ni ber. An players te an fit lova, Durand Cup la khel tur an nih avangin an players tam tak hi inkhelh fit tir an tum a, in enchhin nan an hmang ve bawk a ni. Chutih rualin a khela te hi players chhia an ni lova, tupawh khel se ONGC, Mumbai team annih avangin chak an tum hle thung a ni.

Reitlang FC hian MPL playoff-ah thawm an nei lian a, I-Day ah erawh players te an chau a, fans te’n an rawn tawiawm tha tawh lo bawk nen duh angin an khel tha thei tawh lova, playoff match 7-a goal 4 chauh chhuah theih khan I-Day ah chuan match 2 khelhah goal 7 an chhuah thung. Kumina team indin an ni a. Team naupang te ni mah se I-League team ONGC hi hneh an tum hle a, point hmuh ngei an tum a ni.

Tute nge khel?
Reitlang FC : Bena (GK), Jerry, Simon, Kimkima, Maruata, Zion (Captain), Muanawma (Ruatpuia), Kimtea, Nuntea (Rinpuia), Hruaizela (Hriatpuia), Sena
ONGC, Mumbai : Bilifang (GK), Abraham Lalrinngheta, Robin, Neogi (Modi), Chhuantea, Parwinder, Surabuddin, Pahoon, Muanpuia (Captain- Ruben), Dhanesh, Tariff (Kailash)

Inkhel chanchin
Point la hmu lo ve ve an ni a, chak an tum mai ni lovin chak an mamawh tak zet zet a ni. Mahse beisei angin inkhel a hmuhnawm lova, players te an zawi a, game a dul hle a ni. ONGC lamin playmaker David Rinmuana an khelhtir lova, inhliam palh a hlauhawm avangin Durand Cup atan an dahtha a ni. Captain Muanpuia pawh lakchhuah a ni bawk. ONGC lam hian an nawr zawk a, half chance an hmu zeuh zeuh a ni. Reitlang lam hian chance an nei meuh lova, first half chu goal in pe lovin a tawp a ni.

Second half tan atanga rei lo teah Dhanesh-a shot tha tak chu Reitlang FC keeper Bena’n a lo dang per a, chan lovah awm Tariff Ahmed-a’n minute 47 naah chiang takin a pet goal a ni. Midfield-ah an intum tawk a, clear chance awm lo mah se long range shot a tam a. An inhlau lo tawn hle bawk. Team dang inkhelh result-a innghat an nih avangin an game a dul a tih theih a. Chutih rualin chak erawh an tum hle a ni. Reitlang FC Central Defender Kimkima’n hun tawp dawnah Red Card a hmu a, he a red card hmuh hi a tul lo hle. Lehlam player a nam lui a, referee-in direct red card a pe a ni. Goal dang a luh belh lova, 1-0 in ONGC, Mumbai an chak ta a ni.

Tlangkawmna
Midang khelha innghat annih avangin nidang angin team pahnih te hi an tang lo a tih theih a. Reitlang FC players te phei chu an chau a, an che hlei thei lo a ni ber. ONGC lam paw’n inhliam an hlau a, an fimkhur hle a. Chak erawh an tum hle thung. ONGC hi I-League khel tur an ni a. Star players leh foreign players te khel lo mah se, hetiang anga an khel anih chuan I-League ah pawh point box an nih ngei a rinawm. Chutih rualin Mizo players te an tangkaipui a, Durtlang player Abraham-a a khel tha thei hle. Reitlang FC lam hian squad an nei pan a, players an chau tawh nen, an tuar hle a ni. Tin, players thenkhat thinchhia leh inkhelh laia nsum zo lo an tam a, MPL khel tur an ni a, inenfiah an ngai nasa hle. MPL Playoff-a defensive record nei tha ber kha tunah chuan goal chhuah hnem ber record an siam mek thung. I-Day atang chuan an tla fel tawh a, MPL atan an inpuahchah viau angai ang.

Second match : AIZAWL FC 1-1 MIZORAM POLICE
(Michael Lalremruata 77′ penalty ); (Laldinpuia Own Goal 40′)

I-Day tan hmaa mi tam tak en chak ber chu players nei tha Mizoram Police leh ONGC, Mumbai a ni a. Tournament tan a ni a, ONGC lamin beisei an phak tak loh avangin mi tam takin bultan tha Aizawl FC leh Mizoram Police inkhel hi an en chak ta ber ti ila a sual tam awm love. A chhan chu an in draw chuan an lut ve ve ang a, Aizawl FC an chak loh emaw MRP an chak loh chuan Goal Difference emaw Goal forward hmangin Dinthar FC an la lut thei ve bawk a ni. (match tawp bera Reitlang FC an hneh chuan.) Chuvang chuan he inkhel hian Group A atanga lut tur a hril dawn a, ngaihven a hlawh hle a ni.

Tute nge khel?
Aizawl FC : Msa (GK), Ricky, Laldina, Zohmangaiha, Thomas, Zorema (Rammawia), Tluanga, Johny, Brandon, Zirtea (Michael), Papuia
MRP FC : J.Hriata (GK), B.Sena, Hruaia, Itana, Ropuia, Fakzuala, Sama Hnamte, Hriata, T-a (Apuia), Biaktea, Valpuia

Inkhel chanchin
Inkhelh tantirh atang game a tang nghal hle a, game a rangin a hmuhnawm hle a ni. An inkhel en hian chak zawk nih an tum ve ve tih a hriat a, an indim lo dun hle bawk. Clear chance hmuh tur a awm meuh lova. Half chance kan hmu zeuh zeuh a. MRP lam hian midfield laiah 3 dahin lone striker 1 chiah an dah a. Aizawl FC lamin midfield laiah 2 chauh dahin striker 2 an dah a, nawr nat an tum hle thung. Players te fitness a tha a, chak loh la nei lo an nih avangin chak loh an tum lo dun hle. A lai atang ball an la tlang thei lo ve ve a, a sir atang lak luh an tum a, mahse fullback nei tha ve ve an nih avangin an tlang thei lo ve ve a. Midfield-ah ball a tam a, midfield battle a hmuhnawm thei hle. Minute 40 naah MRP lamin an nawr a, Biaktea shot chu Aizawl FC defender rinawm Laldinpuia’n an lamah a ti lut palh a, 1-0 in MRP lamin hma an hruai ta a ni.

Second half-ah Aizawl FC lamin an siphurh sut an tum a, MRP lamin thun belh an tum ve bawk a, inkhel a hmuhnawm telh telh a ni. Suspend avanga match 4 khel lo Michael-a rawn lut a. MRP lam paw’n Apuia an luhtir ve a, pet goal an tum dun hle a ni. Inkhel a rang telh telh a, game a rorum tan a, referee paw’n card a phawrh zing malh malh khawp mai. Aizawl FC lam hi an chak lo mai dawn emaw tih laiin minute 77 naah penalty an hmu hlauh mai. Playoff-a penalty thelh tawh tu leh bench atanga rawn lut Michael-a rawn pen chhuakin chiang takin a pet goal a, 1-1 a ni a, AFC fans an sapatal a, an bengchheng hle. Aizawl FC lam hian goal 2 thun tawh mah se 1-1 a ni thung. Inkhelh tawp dawn lamah players te an tangulh deuh a, game a rum telh telh a. Players inhliam pawh an awm nuk a, mahse inhliam serious erawh an ni lo. Goal dang a luh belh lova, 1-1 in an in draw a, Aizawl FC leh Mizoram Police te hian Semi-final an lut ta a ni.

Video : Michael-a penalty

Tlangkawmna
Inkhelh hma hian Team pahnih enkawltu te’n draw an tum loh thu leh chak an tum thu an sawi ve ve a. An in draw hlauh chuan an pahnihin an lut ve ve dawn a, hei vang hian Group A team dang te’n an in draw hi an hlau hle a ni. Mahse an inkhel enin in draw an tum lo hle a, chak an tum dun hle a ni. Aizawl FC penalty hmuhna kha a awm lo a tih theih rualin a hma chiaha Aizawl FC striker Michael-a an tihtluk kha chu penalty ni ngei turin a lang. Inkhel enin result (draw) hi a awm hle. A tu zawk pawh hi chak se a awm tho bawk. An inhnehtawk a, an intumtawk a, chak an tum dun hle a ni.

A game hi a class a sang a, Aizawl FC hian an star player inhliam te an tuar lo a tih theih a. Players an nei ngah leh players tha an kawl hnem an thatpui a. Mizoram Police team hi star player rual awmkhawmna a tih theih awm e. An fitness a tha a, bul tan tha lo mah se an khel tha tawlh tawlh a, an khel pawh a hmuhnawm sawt hle a ni. Hemi te team pahnih hian semi-final ah an tumpuite an hneh ve ve chuan final-ah an intum leh thei dawn a, hei vang hian final luh ve ve an chak khawp ang le.