Arsenal midfielder Mikel Arteta chu a kheimit hliam vangin tun season chhung a inkhel thei tawh dawn lo tih British media in an report.

Arteta hi tunhnaiah a khel ṭha thei hle a, Arsenal in Tottenham Hotspurs lehpela pathumna dinhmun an hauh theihna kawngah pawh a thawhhlawk hle. Thawhṭanni zana Wigan Athletic leh Arsenal inkhelh ṭum khan inkhel ṭan hnu lawkah a kheimit hi a tina a, field sirah enkawlna pek nghal ni mahse a khelh chhunzawm thei ta lo a ni.

Arteta kheimit hi scan a nih hnuah a ruh a tliak lo tih hmuhchhuah a ni a, mahse a tihrawl (ligament) a nat deuh avangin Arsenal game pali la awmte chu a khel ve thei dawn ta lo a ni.

Arsenal midfield hi a thawl angreng viau mai a. Inrinnia Chelsea an mikhual hunah Arteta bakah hian Jack Wilshere, Abou Diaby te inhliam vangin an khel thei dawn lo a, Chelsea aṭanga loan a an lak Yossi Benayoun pawhin a parent club hi a hmachhawn thei dawn lo bawk a ni.

Arsenal hian Chelsea bakah Stoke City, Norwich City leh West Bromwich Albion te an la khel dawn a, tunah hian pathumna ni mekin, palina Tottenham Hotspurs aiin point 5 in an sâng zawk a ni. Tottenham hian game 1 in an khel tlem zawk thung.

Chelsea hmachhawn turin tunge Alex Song bulah ding ta ang le?

source: emirates247.com