MFA Inter Dist U 19 Championship:
Mizoram Football Association Inter District Under 19 Football Championship chu April 10 atangin Lawngtlai DFA-in Lawngtlaiah an thleng dawn a, he football intihsiakna hi nakuma AIFF buatsaih National Under 20 Football Championship-a Mizoram team tur thlanna hmasaah hman a ni ang. Lawngtlai DFA chu he intihsiakna thleng tur hian a inbuatsaih mek a, district hrang hrang pawhin team tha tak tirh tumin tan an la mek

MFA Cup:
MFA calendar-a intihsiakna pawimawh ber zinga mi, district hrang hrangte club football inelna sang ber MFA Cup 2012 chu Aizawl District Football Association-in an thleng dawn a, April 23 atangin Aizawlah khelh a ni ang.

MFA Cup-ah hian Aizawla first division club-te bakah ADFA lamin an aiawh club an tir ang a, district hrang hrang pawhin an district-a club thate an tir bawk ang a, Aizawlah club football intihsiak hmuhnawm tak en theih a ni ang. MFA Cup hi Mizorama football club-te inelna sang ber anga ngaih thin a ni a, kuminah pawh hian district pariat atangin club tel thei theuh tura beisei an ni.

Santosh Trophy:
May thlaah hian AIFF hnuaia state leh state football inelna sang ber, National Senior Football Championship for Santosh Trophy chu Orissa-in a thleng dawn a, hemi atan hian Mizoram pawhin inbguatsaihna neih tan nghal a tum. MFA Executive Committee tun hnaia thu khawm chuan a buaipuitu turte dinin kumin Santosh Trophy-ah hian result tha tak neih tumin tan a la mek a, Red Ribbon Football 2012 khelh zawh ve leh hian Santosh Trophy atana inbuatsaihna hi kalpui nghal tum a ni bawk.