Vawiinah Mizoram Premier League (MPL) Playoff Round 3 khelh chhunzawm leh a ni a. Match hnih awm lehin match hmasa zawkah Reitlang FC chuan 3-1 in Chanmari West FC an hneh a. Reitlang FC tan hian Zion Lalramluaha (13′), H. Lallianzama (45+2’) leh Vannunmawia (75’) te’n an thun a. Chanmari West FC tana goal awmchhun hi F.Lalnunhlua (50’) thun a ni thung.

Inkhelh hma chanchin
Reitlang FC hian 4-3-3 formation rawn hmangin tuntum chu hmatawngah Muanpuia an rawn dah a, striker tlan chak H.Lallianzama (Zama) chu winger angin an chhawr thung a. Midfield-ah Captain Zion-a awm lehin ani hi Chanmari West Venga mi a ni a, mahse club-ah erawh Reitlang FC tan a khel thung. Defence-ah chuan Simon-a te awm lehin an khawng leh hle a ni.

Tin, Chanmari West lam hian hmatawngah F.Lalnunhlua (Valtea) rawn dah lehin Mahuma’n midfield a rawn ho leh a. Defence erawh Captain Lalchhuana’n a rawn ho leh a ni.

Reitlang FC hian inkhelh hma hian point 3 an hmu a, Chanmari West FC erawhin point an la hmu lo thung. Chuvang chuan he inkhel hian ngaihven a hlawh a. Club pahnih tan hian a pawimawh hle a ni.

First half : Reitlang FC in bul an tan tha !
Reitlang FC hian bul an tan tha a. Fans an nei tha bawk a, an phur hle a. An players te hi an fit thain an sang tha a, an rang em em bawk a ni. Ball thiam tia sawi tur an ni lova mahse an fitness leh an players tlanchak te an hmang tangkai a, inkhelh tantirh atang ball an vawrh lut nasa a, an hlauhawm nghal hle a ni.

Tan atanga rei lo teah Senior player Vannunmawia (Nuntea) chuan chance tha tak a missed a. Mahse rei pawh a ni lo, Reitlang FC lam hian an Captain hmangin hma an hruai a. Chanmari West FC lam hian offside trap an siam sual a, Reitlang FC Captain Zion-a chu free taka lo awmin a ni hian a pet goal ta a ni. An veng lamah a club tan goal a thun a ni. Hemi hnu deuh hian Zama leh Muanpuia ten chance an nei leh bawk a. Uihawm takin an missed ve ve a ni.

Chanmari West FC lamin chance an nei veleh zauh zauh a. An striker Valtea chuan chance tha tak a nei a, keeper nen chiah an awm tawh a, a pet out hlauh a ni. An innawr tawn zel a. Chanmari West FC lam hian Reitlang defence an sutlang thei lova, chance mumal an nei thei meuh lo a ni.

Reitlang FC lam hian an winger te an tlanchak tih an hria a, winger te ball an pe nasa a. An sang tha bawk nen cross ball-ah an hlauhawm thei hle a ni. Zama leh Muanpuia te an langsar hle a. Chanmari West FC lam hian Valtea an chhawr tangkai hle bawk.

1-0 in first half a tawp mai dawna rin anih laiin extra time-ah striker tlanchak Zama chuan counter attack atang through ball tha zet a hmu a, a thelh lo chiang kher mai. Mawi takin a pet goal a, 2-0 in Reitlang FC lamin hma an hruai der a ni. Reitlang FC fans leh players te an sapatal a, an lam nasa a, an bengchheng hle a ni. Reitlang FC Coach Chawnga pawh touchline (sideline) bulah a lawm lutuk chu a tlan thui hle bawk !

Second half-ah goal hnih dang a luh belh!
Chanmari FC lam hian substitution te siamin chak an tum hle a. Achhanchu match thum khelha point hmuh loh an duh bik lova. Tin, point box nih an duh bik hek lo! Chanmari West FC lam hian bul an rawn tan tha deuh a, mahse Reitlang FC lam hian an goal thun tawhte hi ‘sut’ tir an tum bik lova. Midfield battle a hmuhnawm chho hle a ni.

Minute 5 chauh an khel a, Chanmari West FC lam hian goal an rawn thun ve thung a. Striker taima Valtea chuan box pawn atang kawh takin a pet a, Reitlang FC Keeper Bena chuan lo dang hman lova, a goal ta a ni. He goal hian Valtea class san zia a tilang a, chutih rualin Keeper Bena khan a chhuah ho a tih theih. Dive hma se chuan a save hman ngei ang le. Duh angin a timing a dik tawk lo a tih theih.

Hemi hnu hi chuan Chanmari West FC lam te an rawn phur thar a, an khel tha tawlh tawlh a ni. Reitlang FC lam hian an hmatawng te an tlanchak tih an hria a. Counter attack atang nawr an tum a, first half angin an nawr pup pup tawh lo a ni. Reitlang Striker Muanpuia chhuakin a aiah Lalruatpuia a rawn lut a. Ruatpuia rawn luh hnu hian Zama pawh a sirah awm tawh lovin a laiah a tawlh lut a, Ruatpuia hi a sirah a awm thung a ni.

Chanmari West FC lamin an nawr chhunzawm zel a. Mahse an duh ber goal erawh an hmu thei lova, counter attack atang Reitlang FC hian chance an nei leh zeuh zeuh a. Chanmari West striker Valtea hi a ‘day’ chu ni se, goal 2 tal a thun ngei ang le.

Reitlang FC lam hian minute 74 naah penalty an hmu hlauh a. He penalty hlawhchhuaktu, bench atanga rawn lut Ruatpuia hi a fing hle a ni. A ball khalh lai chu Chanmari West keeper hian a lo tawk a, tlukna khawp chu a ni lo, mahse ‘contact’ an neih miau avangin Ruatpuia hi a tlu a, penalty an hmuh phah ta a ni. Tlu lo pawh ni se Ruatpuia hian a pet goal kher lovang. Mahse fing takin a tlu a, penalty an hlawhchhuak a ni. Nuntea rawn pen chhuakin mawi takin keeper a rawn buma a rawn pet goal a ni. Minute 75 a ni a, 3-1 in Reitlang FC hian hma an hruai der a ni.

Chanmari West FC lam hian thih tha nen an nawr let a, chak loh an tum tawh lova, an theih tawpin an nawr tang tang a. Reitlang FC hian 3-1 anih tawh hnuah attacking game khelhin awmzia a awm tawh lo tih an hria a, game fing tak rawn khelin defensive game an rawn khel a. Mahse Chanmari West FC lam hian an pet goal thei bik lo a ni.

Goal dang a lut tawh lova, 3-1 in Reitlang FC an chak a ni. Tihian, match thum khelhah Reitlang FC hian point 6 an hmu a, RS Annexe nen point inang hmu mah se goal difference-ah an sang zawk a, table-ah pathumna an ni a. Chanmari West FC erawhin vawithum khelah chak an la nei lova, point an la hmu lo a ni.

Fans neitha Reitlang FC
Reitlang FC hi tun playoff-a fans la neitha ber tih ngam an ni a. An fans te hi an fakawm hle a ni. A hmei a pain an rawn thawkchhuak a. An zai a, an au a, an players te tan chakna hnar an ni a tih theih. “Awle, awle, awle, awleeee… Reitlang FC, kan chak zel dawn” tiin an au rual dual dual a ni. Players te tan pawh heti khawpa fans te tang lutuk hmuh chuan khelh a nuam ngei ang le. Tin, fans te an tan miau chuan players te paw’n an khel mai mai ngam lova, an theih tawp an chhuah phah a ni. Reitlang fans te hian fak an phu ngawih ngawih a ni. Club dang te pawh hian entawn thei se a lawmawm ngawt ang.

Tlangkawmna 
Reitlang FC hian game plan mumal tak an nei a. An players te hi an fitness a tha tih an hria a, tin, an tlan chak bawk a. Chu chu hre rengin game rang an khel a. Winger te an hmang nasa a, cross ball an uar em em bawk. Fans heti zat an nei thei hi an fakawm hle bawk. An in puahchahna a tha tawk a, an game pawh a tha tawlh tawlh a ni.

Chanmari West FC erawh match thum khel tawhin vawi khat mah an la chak lova. Inkhelh apiangin bul an tan that paw’n an lamah goal a lut zel a. An tuar phah a tih theih. Mahse fighting spirit an nei tha a, an rawn fight let a. Mahse players te inthlahdah a lang a, an chak zo lo thin a ni. An game khelh tawh zawng zawng thlir letin hneh loh em em an nei lova mahse a chak lo zawkah an tang ziah a ni. Hei vang hian inenfiah chu an ngai ngei ang le.

Match Statistics

Chanmari West FC 1-3 Reitlang
(F. Lalnunhlua (Valtea) 50′) – (Zion Lalramluaha 13′; H. Lallianzama (45+2)’; Vannunmawia (pen) 75′)

MPL PLAYOFF ROUND 3 TABLE