Mizoram Premier League (MPL) playoff round 5 match hnuhnung berah Chanmari West FC leh Kanan FC te chu 1-1 in an in draw a, point 1 ve ve an hmu a ni. Vawiina inkhel hnuhnung zawkah hian Chanmari West FC tan F.lalnunhlua (Valtea) chuan goal a thun a, Kanan FC tana goal thuntu hi Lalchhuansanga a ni a, goal hnihte hi penalty ve ve a ni. Tihian Kanan FC hian point 8 an hmu a, Chanmari West FC lam hian point 4 an hmu thung.

Inkhelh hma chanchin
Round 3 khelh zawh anih khan entute chuan he match hi an ngaihven lova, a hmuhnawm pawh an ring lem lo mahse round 4 khelh zawh a nih kha chuan Chanmari West FC te hian point 3 an rawn hmu a, beiseina thar an rawn nei a, an rawn phur thar hle a ni.

Chanmari West FC te hian chak an mamawh a, an chak phawt chuan point 6 an hmu ang a, match 2 an le nei a, an chak vek chuan point 12 an hmu dawn a ni. Match 2 an khelh turah hian tla tawh Theiriat FC leh chak la mamawh, Aizawl FC an tum dawn a, a la ‘tough’ dawn hle a. Hemi anih avang hian chak ngei ngei an mamawh a ni.

Kanan FC lam hian point 7 an hmu a, chak an la mamawh thova, achhanchu an draw chuan Goal Difference-ah Reitlang FC leh  Aizawl FC an pha lova, chak an mamawh hle a ni. Tin, match 2 an la neihah hian tla tawh College Veng FC leh tling tawh Chanmari FC an la tum dawn a, an vannnei a tih theih. Mahse College Veng FC hian point box nih an duh lova, Chanmari FC lam paw’n chak loh an duh lova, chuvang chuan he inkhel hi an tan chuan a pawimawh hle a ni.

First half hmuhnawm takah goal hnih !
Inkhelh tan tirh atang game a tang nghal at a, game pawh a hmuhnawm nghal hle a ni. Chanmari West FC lam hian an nawr zawk a, Kanan FC an bet a. Mahse Kanan FC lam hian striker tlanchak Sangbera an nei tih an hre reng a, bet zawkah tang mah se counter attack-ah Sangbera hman tangkai an tum hle a ni. Sangbera hian chance tha zet a hmu a, a head goal ngei dawna a lan laiin a head out hlauh a.

Video : Chanmari West Striker Valtea Penalty

Chanmari West FC lamin minute 14 naah penalty an hmu a. Chanmari West FC striker hlauhawm F.Lalnunhlua (Valtea) chu rawn pen chhuakin ani hian a rawn pet goal a ni. Tihian Valtea hian goal 5 thun tawhin Chanmari FC striker Tata nen top scorer an ni mek a ni. Mahse minute 4 bak a la ral lo tihin Kanan FC lam hian penalty an hmu ve a. Striker Puia (samsei) chuan box chhungah ball la lutin defender-in a lo titlu a, penalty a hlawkchhuak a ni. Kanan FC Captain Lalchhuansanga a rawn penchhuak a, a rawn pet goal a, minute 18 lekah 1-1 a ni der mai.

Video : Kanan FC Captain Lalchhuansanga penalty

Mi tam tak chuan goal a luh belh nual an ring a, game a open a, chak mamawh ve ve an ni a, defensive game an khel duh lova, attacking game an rawn khel ve ve a ni. An in hlau lo ve ve a, mahse clear chance erawh a awm thei meuh lo. Game an inhnehtawk chhova, ball possession pawh a inang chho tan a.

Kanan FC lam hian an striker Sangbera hman an tum hle a mahse Chanmari West FC lam hian game plan mumal tak an nei a, Sangbera hian chance a nei thei meuh lo a ni. Sangbera an ‘check’ nasat avang hian Puia’n chance a ngah phah hle a. Chanmari West FC defender te hi an khel tha a, an Captain leh defender ni bawk Lalchhuana khel lo pawh an tuar lo a tih theih.

Chanmari West FC defender leh Keeper chuan ball inpek an tum laiin Kanan FC winger Ruatsanga’n a va nangching a, a pet goal tep a ni. Chanmari West FC winger Tlanghmingthanga (Lalpuia) a khel tha hle a, chance pawh a nei nual a mahse goal erawh a thun thei meuh lo. Tin, Midfielder Rinsanga pawh a khel tha hle a, vawiina Captain Mahuma nen midfield-ah ro an rel a ni. Goal dang a luh belh lova, 1-1 in first half a zova.

Second half-ah erawh a goal a lut thei lo !
Point mamawh ve ve an ni a, a hmuhnawm chhunzawm beisei a ni a mahse second half tir lam erawh duh angin a hmuhnawm lem lo. Duh angin game a open ta lo deuhva, an inveng tawn a tih theih. Mahse a hnu deuhah erawh game a hmuhnawm chho leh a. Chanmari West FC lamin Lalrinsanga hmangin an ti goal tep a, a head out hlauh a ni. Kanan FC winger Ruatsanga bawkin chance a nei leh a, bar a rawn pet per a.

Chanmari West FC winger Lalpuia hmel kan hmu tam tan a, a khel tha a, chance a rawn nei zeuh zeuh a. Freekick atang paw’n chance a rawn nei a, post a pet per a ni. An inhnehtawk chho zel a. Chanmari West FC  lamin ball an chang tam deuhva, mahse Kanan FC lam hian an hmatawng tlan chak ho hmangin an nawr let a, an hlauhawm thei.

Sangbera cross tha tak chu Ruatsanga chuan lo head-in a goal dawn emaw tih laiin a head out hlauh a.  Sangbera’n chance a nei leh bawk a, mahse goal erawh an thun thei bik lova. Chanmari West FC lamin an nawr chhunzawm a, half chance an nei zeuh zeuh a, mahse clear chance an nei thei bik lova, an pet goal thei meuh lo a ni. Chanmari West FC lam hian nawr a, pet goal an tum a mahse Kanan FC erawhin counter attack atanga goal thun an tum tlat thung. Goal dang a lut lova, 1-1 in an in draw a ni.

Sawi zui ang
Chanmari West FC te hian an khel tha a, beisei nei tawh lo kha an match hnuhnung berah rawn chakin beiseina thar an rawn nei a, hei vang hian an rawn phur thar leh hle a ni. Players an nei chhe lova, an vanduai thei a, an chak lo leh thin a ni. Vawiinah pawh chak tumin an bei a mahse an draw a, match 2 khelh tur an la neihah hian an chak anih chuan an la lut thei dawn a ni. An fighting spirit a tha a, mahse Aizawl FC te an la tum dawn a, qualify tak maw !

Kanan FC hian point 8 an hmu nain an dinhmun hi a la tha em em bik lova. Achhanchu College Veng FC hian sawi tawhin angin point box nih ringawt an duh lova. Tin, qualify tawh Chanmari FC hian inhnehtir an duh dawn lova, chuvang chuan MPL playoff boruak hi a ‘hot’ chho tawlh tawlh dawn a ni. Kanan FC hian an striker tlanchak te hi an chhawr thiam a, Aizawl FC an hneh anga an khel anih chuan an qualify ngeiin a  rinawm.

Match Statistics
Chanmari West FC 1-1 Kanan FC
(F. Lalnunhlua (pen, 14′); (Lalchhuansanga (pen, 18′)

MIZORAM PREMIER LEAGUE PLAYOFF TABLE