Manager Benjamin Laldinpuia chuan, “Thangkhat lian zet chu football team ka enkawl tawh a, hetiang em ema goal thun theih loh tum hi ka la tawng ngai lo,” tiin nimina Karnataka 2-3 a an hneh loh hnu lawkah a sawi a. National Junior Football Championship, West Bengal-a nimina zawh takah Mizoram chu pahnihna an ni ta a, an point hmuh zat hmu ve tho West Bengal chu goal diference-ah sang zawkin an champion.

Nimina Siliguri-a hmun hniha inkhelah Mizoram hian rin loh takin Karnataka 2-3 in an hneh lo a, West Bengal pawh chak bik loin Jharkhand-in 2-1 in an hneh. Team palite hian point li an hmu theuh a, a tawpah goal difference-a sang ber West Bengal an champion ta daih a, Mizoram pahnihna an ni.
West Bengal hian point li hmu rau rauah goal difference +3 an nei a, Mizoram leh Jharkhand hian goal difference 0 ve ve neiin Mizoram hian goal an thun (goal for) tam zawk a, Mizoram hi pahnihna niin Jharkhand hi pathumna an ni a, Karnataka hi an goal difference chu -3 niin palina an ni.

Inkhel mak tak chu
Mizoram hian a tir atangin inkhel an thunun zawk a, goal chance tha pawh an nei nual a, an thun thei tlat lo. Manager Didina sawi danin, “First half-ah ringawt ‘clear chance’ tia sawi ngam vawi nga tal chu kan nei ang,” a ti a, an khung miau si lo.

Karnataka hian an goal shot hmasa berah counter attack atangin an thun ta mai a, 1-0 a ni. He mi hnu hian freekick an hmu a, an pet goal zui leh a, 2-0 a ni ta. Chak ngei ngei tum Mizoram rawltharte an talbuai tan ta a, an si phurh vawi khat an sût hnuah counter attack-ah bawk goal an chhuah leh a, a tawp lamah goal khat thun ve leh tho mahse Karnataka hi 3-2 in an chak.

Team enkawltu thu hla
Mizoram manager chuan, “Kan hneh lo thei hi a mak a ni. Group match-a goal kan khung teuh teuhna inkhel ang tho khan inkhel kan thunun hneh a; mahse mak tak maiin goal kan thun thei lo a, a mak ka ti takzet a, heti em ema kan thun thei lo hi ka naute pawh ka dem hial a ni… junior level-a India champion nih hi a harsa a, kan chance a that tehlul nen a mak khawp mai,” a ti.

Coach Laltuakliana chuan, “A thinrimthlak tih mai loh chu sawi tur ka hre lo. Kan hneh dan em em leh a score-a kan chak loh theih dan hi a mak ve khawp mai a, kan chance a that tawh tehlul nen a zahthlak duh khawp mai,” a ti. Mizoram hi an first choice defender inhliam leh hrem tawh vangin pahnih an khel thei lo a, fonal round match hmasa pahniha goal an chhuah miah loh hnuah match awlsam ber tura rinah goal thum ngawt an chhuah.
=====================
Team     P    W    D    L    GF    GA    GD    Pts
West Bengal    3    1    1    1    6    3    3    4
Mizoram    3    1    1    1    3    3    0    4
Jharkhand    3    1    1    1    2    2    0    4
Karnataka    3    1    1    1    4    7    -3    4

source: vanglaini.org