Zanin EPL inkhel ah Manchester United chuan an home-ah Everton lo mikhual in 4 – 4 in an lo draw a. He inkhel hi a hmuhnawm in Everton huaisen zia kan hmu. United tan Rooney in vawi hnih, Welbeck leh Nani te’n goal an thun a, Everton lam ah Jelavic in vawi hnih, Fellaini leh Piennar te’n an thun ve bawk a ni. Old Trafford ah tunge United leh Everton hi 4 – 4 a an in draw ring ang le! Football-ah thleng thei lo a awm lo.

Manchester United starting Line-up: De Gea, Ferdinand, Evans, Rafael, Evra, Nani, Carrick, Scholes (Jones 86’), Valencia (Hernandez 89’), Rooney, Welbeck

Everton starting Line-up: Howard, Hibbert, Heitinga, Jagielka, Neville, Distin (Cahill 83’), Gibson, Osman (Mc Fadden 63’), Piennar, Fellaini, Jelavic

1st half inkhel
Tan atang mikhual Everton zawk an huangtau zawk a, an khel tha zawk in United defense lam an lang zing zawk a, mahse clear chance erawh an nei bik lo. United lam in an nawr pup pup bik lo, midfiled-ah ball inpe kualin an game tempo a muang khawp mai. Minute 33-ah Everton lam hian United an barakhaih ta. Dinglam atanga Tony Hibbert in far post lam a, a ball vawrh luh tha em em mai chu tunlaia goal thun lova awm hle hle thei lo Nikica Jelavic chuan a tauh lut a, a goal hi angle a tight-in a class kher mai. United an harh thar a, an nawr in ball an chang tam sawt. Minute 41-ah veilam atanga Nani  ball vawrh luh chu Wayne Ronney chuan defender pahnih karah a lo tauh lut a, 1 – 1  a ni. Goal dang luh belh tawh lo in chawlh an hmang a.

2^nd half- Goal 6  sur leh Everton comeback ropui chu!
Second half chuan mit a ti tlai ngei mai. Goal a sur a, an in pet goal siak a ni ber. United in chawlhlawk an hmang tangkai ni tur a ni, ball an chang tam zawk  a, an goal nawr pawh a na zawk. Minute 57-ah Valencia cross kal zel an clear theih loh chu Nani chuan Welbeck tan a head zauh a, he England forward hian uluk tak a a siam hnu a mawi lutuk in a chung veilam kil ah a pet lut, 2 – 1 a ni. He goal hi Eveton lam chuan an ngai thiam lo hle a, a chhan chu Piennar inhliam a a tluk laia thil thleng anih vang a ni. United an phur telh telh a, Nani, Welbeck, Valencia leh Rooney an tal ‘hiar’ telh telh. Old Trafford  bengchheng an reh hma in United lam hian an thun chhunzawm leh a, Welbeck chuan Nani tan tha lutuk a a siam hnu in he Portuguese winger hian Howard a ‘chip’ khum a, 3 – 1 in an lead ta.

United an khel tha chhunzawm zel a, mahse Everton lam an beidawng duh lo. Minute 60-ah Tony Hibbert-a cross tho chu Marouane Fellaini chuan mawi tak maia lo volley-in, De Gea chuan a kut in lo khawih hman mah se  a goal thova. Everton an phur thar a, mahse mual neitu United lam an rawn tang. Rooney leh Welbeck te mawi lutuka an in pass hnu ah Rooney chuan keeper dinglam ah a pet goal in United goal 4-na a ni ta. He goal lut tur a Rooney leh Welbeck in link-up nalh lutuk kha chu United fans leh England mipui an lawm khawp ang le. Hemi hnu hian United lam hian an ti goal leh thelh a, Nani chuan Rafael-a cross chu goal ban a pet per.

Minute 80 a pel tawh a, mi tam tak chuan United chak chu ‘bel chhungsa’ ah an dah tawh ngei ang. Mahse David Moyes-a naute hian Theatre of Dreams pawh nise an zam lo tih an lantir a, minute 83-ah Fellani-a head chu Jelavic bawk chuan a ti goal leh ta a, a goal a rang in keeper dinglam ah a pet lut, De Gea chu milim ang in alo ding tawp mai. Everton an phur thar a, Fellani a tal ‘hiar’ kher mai. United an in siam rem hma in Fellani bawk chuan box chhung ah Piennar atan tha lutuka siam in ani hian buai map lovin a lo ti goal a, 4 – 4 a ni ta der mai!

Antonio Valencia aiah Hernandez rawn luh tir in United hian hun tawp dawn a an ‘trademark goal’ rawn thun an tum hle mai. Rio Ferdinand chuan chuan a ke veilam hmang in a thun thelh a, mahse Howard chuan lo save-in, goal dang luh belh tawh lovin hun a tawp zui ta a ni.

Zofooty Match Analysis
Everton khan draw kha an phu hliah hliah. United lam in thawkkhat laiin 3 – 1 leh 4 – 2 in lead mahse an zam lova, David Moyes-a nau te khan an fight a, goal 4 lawih Old Trafford-ah an khung thei.  Si phur mahse an zam lo a, an chance neih an hmang tangkai hle bawk a ni. Tlar hmalam ah Fellaini leh Jelavic an hnawksak a, United defender te’n an dang zo lo. Rafael leh Valencia te kha dinglam ah khel tha viau mah se ball tha tak an vawrhchhuak lo tih theih a ni. Hibbert-a’n vawi hnih lai tha lutuka free cross a siam lai khan Evra kha khawiah nge a lo awm? Chutih rual chuan United tlar hma leh alai an khel tha a, an defense te’n goal an venghim zo lo mai a ni. Danny Welbeck leh Rooney in man zia kan hmu leh a, Euro hnaih tawh lam ah hian England mipui tan thu lawmawm a ni ngei ang. Inhliam damkawr Nani a kheltha a, a laiah Carrick a tangkai hle bawk. Sawi tur a tam, he inkhel hi a hmuhnawm a, an in draw hi a result  tur tak a ni kan ti thei em le? Match of the season a ni thei hial ang em?

Zanin in draw hi Manchester United  thenawm Manchester City tan chuan thu lawmawm a ni a, United hian tunah hian point 6-in hma an hruai a mahse zanina City-in away-a Wolves an hneh a nih chuan an inthlauhna hi point 3 chauh a ni tawh dawn a. Manchester derby karleha lo awm turn nen chuan United dinhmun hi a chiang lo ta sawt tihna ni. City lam chuan United chetsual hi advantage-a lak an tum ngei ang le. English Premier League title in um a ‘hot’ telh telh dawn e.