Premier League in kum 20 a tlin (1992/93 – 2011/12) denchhena award hrang hrang an sem tur zingah, kum 20 chhunga Premier League manager ṭha ber an thlan tur hi ngaihven leh ngaihhlut hlawh ber pakhat a ni ngei ang. Premier League ah hian manager ropui tak tak, khawvel pum huap pawha ‘ber’ nihna nei te an lo awm tawh ṭhin a, heng manager ropui tak takte hi Premier League ropuina pakhat an ni a tih theih hial awm e.

Manager ṭha tamtak zingah Premier League-a manager ropui bik pangate chu ’20 Seasons Awards: Best Manager’ dawng thei tura thlanchhuah an ni a, heng mi pangate hi expert panel in uluk taka an exam leh hnuah, kum 20 chhunga Premier League manager ropui ber hi an puang dawn a ni. Award ṭhenkhat, mipui nawlpuiin kan vote ve theih chu post hmasa lamah khan a awm tawh a. Best Player, Best Manager leh Best Season te hi chu a thlang tur bik ‘panel’ ruat an ni thung. Best Player nominees te hi post hranah siam a ni ang.

Best Manager award dawng thei dinhmuna dingte chu a hnuaiah hian tarlan a ni a. Uluk takin han chhiar la, tunge dawng awm bera i rin ve le?

1. Sir Alex Ferguson

Club: Manchester United
Premier League Seasons: 20
Premier League Titles: 12
Fixtures managed: 765 (as of 04/04/2012)
Wins: 496
Draws: 162
Losses: 107
Premier League Manager of the Season: 10

Sir Alex Ferguson hi manager zinga Premier League season 20 awmkim vek awmchhun a ni a. Heng kum 20 te hi Manchester United ah vek a hmang a ni. Kum 20 chhung hian Old Trafford ah player leh staff tam tak an lutin an chhuak tawh a, mahse thil inthlak ve ngai lo a awm a, chu chu Manchester United hi Premier League a team ṭha ber pawl an ni ziah hi a ni.

Ferguson-a hnuaiah Manchester United hian Premier League an thunun a tih loh theih loh a, season 20 ah vawi 12 ngawt a champion pui tawh a ni. A hmelmate tân manager hlauhawm a ni a, a naute tan chhantu thlamuanthlak a ni thung. Premier League-a talent ropui tak tak a chherchhuak tawh a, Best Manager award dawng tur pawhin a rinawm deuh ber awm e.

2. José Mourinho

Club: Chelsea
Premier League Seasons: 4
Premier League Titles: 2
Fixtures Managed: 120 (as of 04/04/2012)
Wins: 85
Draw: 25
Losses: 10
Premier League Manager of the Season: 2

Premier League manager awm tawh zingah, Jose Mourinho tluka chanchin ngah an awm bik kher awm lo e. ‘The Special One’ inti ngat Mourinho hian kum 2004 ah Chelsea a enkawl ṭan a, Arsenal leh Manchester United inkar boruak ‘hot’ vanglaia Chelsea a champion pui thei hi thil ‘ropui’ a tling.

2004/05 season-ah Chelsea chu Premier League-ah a champion pui nghal a, hemi kum hian point hmu tam ber (95), chak ngun ber (29) leh goal chhuah tlem ber (29) record an siam vek nghe nghe. Hei hi kum 50 hnua Chelsea in Premier League title an lak leh hmasa ber a ni nghe nghe. Stamford Brigde ah kum 2007 thleng a awm a, a awmchhung rei lo te ah Premier League vawi 2 ah Chelsea a champion pui a, FA Cup leh League Cup a lâkpui bakah Europe-a team hlauhawm ber pawlah a hlangkai bawk. Jose Mourinho kha awm lo se Chelsea hian tun dinhmun an pha kher angem tih theih khawpin Chelsea kha hma a sawn pui a ni.

3. David Moyes

Club: Everton
Premier League Seasons: 10
Premier League Titles: 0
Fixtures Managed: 382(as of 04/04/2012)
Wins: 154
Draw: 104
Losses: 124
Premier League Manager of the Season: 0

Premier League-a manager zahkai ber pawl David Moyes hi kum 10 chuang Everton manager a ni tawh a, Premier League title lakpui lo mahse manager ṭha ber pawl a ngaih a ni. Game plan thiam chungchuang, a player neihte hmang thiam leh player lei thiam tia hriatlar a ni a. Everton-ah player ropui tih tur an awm mang lo chunga team khelh harsa ber pawl an ni reng mai hi David Moyes thawhrah liau liau a ni.

Moyes-a hnuaiah Everton hi Premier League season tawpah top 10 ah an lang deuh ziah a, FA Cup final luhpui tawhin, UEFA Champions League hial pawh a lo hruaithleng tawh a ni. Ṭum thum zet chu League Managers Association Manager of the Year lawmman a dawng tawh bawk.

4. Harry Redknapp

Clubs: West Ham United, Portsmouth, Southampton, Tottenham Hotspur
Premier League Seasons: 18
Premier League Titles: 0
Fixtures Managed: 587(as of 04/04/2012)
Wins: 224
Draw: 152
Losses: 211
Premier League Manager of the Season: 1

Harry Redknapp hi Premier League-a manager experience ngah ber pawl a ni tawh a, game tactic hre tak, tumpuite a zira game plan thlak zung zung thiam tia hriatlar a ni.

Redknapp hi club pakhata awm nghet lova insawn kual deuh zung zung mi a ni a. Kum 1998/99 season ah West Ham United aṭanga hmelhriat hlawh ṭanin, hemi kum hian West Ham chu League-ah pangana a nihpui a, UEFA Cup a hruai thleng. Hemi hnu hian Portsmouth chu Football League Championship ah a champion pui a, Premier League ah a hlangkai ti ila kan uar lutuk awm lo ve. Southampton te a’n enkawl zuai a, Portsmouth ah kir lehin 2007/08 ah FA Cup ah a champion pui.

2008/09 season tirah, khatih laia relegation zone a awm Tottenham Hotspurs ah lutin, hmuh theihin hma a sawnpui a. Tunah chuan top 4 ah an langpha zak zak tawh a, Champions League an khelh ve pawhin a vantlang chunglam an ni pha. A team enkawlte attacking game hmuhnawm tak a khelhtir thei deuh zel hi ngainat a hlawh chhan pakhat a ni awm e.

5. Arsène Wenger

Club: Arsenal
Premier League Seasons: 16
Premier League Titles: 3
Fixtures Managed: 593(as of 04/04/2012)
Wins: 344
Draw: 147
Losses: 102
Premier League Manager of the Season: 3

Premier League ah Arsenal leh Arsene Wenger te hi sawihran theih an ni tawh lo. September 1996 ah Highbury ah lutin, Arsenal team chu Premier League team ‘hmuhnawm’ berah a siam a, anni aia game ‘mawi’ an awm chuang lo. Game mawi an khel mai a ni lova, game mawi tak khel chungin a champion pui ṭhin a, player naupang tak tak laluta, player ṭhaa chherchuak thiam a nihna hi a ropuina pakhat a ni.

Tu teh vak hriat lohin Premier League a rawn lût a, a season hnihna lekah Arsenal chu Premier League-ah a champion pui a. Kum 2003/04 season-a ‘Invincibles’ ten season pumpui hneh loh nei loa an champion zui kha Premier League awmchhung chu sawizui a ni tawh ang. A hnuaiah hian Thierry Henry, Patrick Vieira,  Cesc Fabregas te ropui takin an lo khel tawh a, tunah Robin Van Persie a khel mek bawk. Arsene Wenger hnuaiah Arsenal in an duh ang taka an khelh tawh chuan hneh theih loh an nei lo.

source: premierleague.com