French club hausa Paris Saint-Germain chuan Napoli aṭangin Ezequiel Lavezzi an lei tih an puang. Lavezzi hi tun nipui bazara PSG player lakluh hmasa ber a ni.

Argentina national team-a telpha Lavezzi hian Thawhṭanni khan medical a paltlang a, PSG ah hian kum 4 chhung contract a ziak a ni. Club pahnihten a man zat hi an puangzar lo ve ve nachungin PSG hian €30million ($38m) vel an sêng nia rin a ni. Tunhnaiah PSG hian player lei nan sum an ui lo thei hle mai a, a man zat report hi a dik chuan Lavezzi hi Javier Pastore leh Nicolas Anelka te tih loh a an club history a player to ber a ni ang.

PSG official website ah chuan, “Thawhṭanni khan Ezequiel Lavezzi chu Napoli aṭangin Paris St Germain ah a lut fel ta a, kum li chhung PSG player a ni ang.” tiin a inziak a, Lavezzi hian jersey no. 11 a hak tur thu a inziak bawk a ni.

Napoli pawhin Lavezzi chhuah thu hi official website ah an tarlang tawh a. “President Aurelio De Laurentiis leh he club nena inkungkaihna nei zawng zawngte’n ‘il Pocho’ chungah lawmthu kan sawi duh a. He team ṭhanlenna leh hmasawn nan a thawhhlawk em em a, Italy leh Europe ah goal pawimawh tak tak min thunsak bawk a ni.”

Hun engemaw chen chu Napoli hmatawng pathum – Hamsik, Lavezzi, Cavani – te hi Italy mai ni lo, Europe a ‘attacking trio’ hmuhnawm leh ṭha ber pawl an ni ṭhin a. Anni pathum zinga pawimawh leh ball thiam ber chu Lavezzi hi a ni awm e. Ball tlanpui thei, mit fing leh goal pawimawh thun thei tak a ni a, a awm loh chuan Napoli goal nawr pawh a na lo deuh sawtin a rinawm.

Kum 27 a upa Lavezzi hian kum 2007 ah Napoli a zawm a, Serie A ah kum nga a khelh chhungin goal 38 a thun hman a ni. Argentina tân  vawi 19 a inlan tawh bawk.

source: fifa.com