Ramhlun North-in Aizawl FC an hneh

Mizoram Premier League Season 5 Round 9-ah champion lai Aizawl FC chu si khat faiin Ramhlun North FC lakah an tlawm. He inkhela goal awmchhun hi Ramhlun North striker thar Oneyama Francis thun niin MPL kaithar goalkeeper Liansangpuia chu man of the match atan thlan a ni.

Champion lai an chuai?
Aizawl FC hi champion lai nimah se tun season-ah an talbuai hle a, Ramhlun North lakah pawh hian awlsam taka chak tura beisei an ni lo. Ramhlun North hi table mawnglam atanga talchhuah tum an ni a, foreigner striker an lak bawk avangin Aizawl FC hneh thei tur khawpin phurna an nei.

Inkhel tan a ni a, Aizawl FC lamin bul an tan tha a, chutih laiin Ramhlun North goalkeeper an paltlang thei lo. Ramhlun North-in an chance neih hmasak berah thunin minute 14-ah Zosangliana (Chhaia) vawrh luh chu Francis-a’n a club thar tana a match hmasa berah a khung nghal.

Inkhel hi chhum zingin a tibuai deuh reng a, hei vang hian inkhel boruak pawh a dul deuh niin a lang. Team pahnih ten chance sawi tur an nei mumal lo a, minute 41-ah inkhel tihtawp niin an tan leh hnuah pawh mual laia indang tawnin chawlhlawk an hmang. Chawlhlawk lai hian chhum a zin nasat avangin inkhel chhunzawm theih a ni lo a, Ocotber 27 zana inkhel hi October 28-ah chhunzawm a ngaih phah ta a ni.

Vawiin chhawhnu lam khan chhunzawm a ni a, ruahsurin a la tibuai tho – mual laiah tui a tling nasain player-te an che hleithei lo. Mual lehlam lehlamah foreigner striker te an hlauhawm leh zauh thin a, Aizawl FC tan Bright Middleton Mends chuan a chance tha hlohin Ramhlun North FC tan pawh Francis-a’n goal khung theih tur a khung bik lo.

Second half a chance tha ber tih theih chu Aizawl FC captain Rohminga chuan hmuin Lengpui tlangval shot tha tak chu a goal lo hlauh a, I League club hian goal khung theihna tur nei bawk mah se Ramhlun North goalkeeper Sangpuia khelh that ni an tawn vangin goal an khung thei lo.

Inkhel tan atanga dar 20 hnuah result a hriat ta a, Ramhlun North-in an Nigerian forward Francis hmangin Aizawl FC 1-0 in an hneh.

ZoFooty Statistics:
Ramhlun North FC 1-0 Aizawl FC
RNFC : Oneyama Francis 14’
MoM: Liansangpuia, RNFC
37% Ball Possession 63%
9 Shots 14
4 On Target 9
3 Yellow Cards 0
0 Red Cards 0
Powered by Rainbow Multibrand Mobile Showroom.

Tute nge khel?
Ramhlun North : Liansangpuia, Lalramthlamuana, Lalmalsawma, Oneyama Francis, Lalmuanawma (Lalruatfela 65’), Zosangliana Sailo, C. Ramdinmawia, Lalruatkima Dosel (Lalchhuanpuia 46’), Jerry F Zonunsanga (David Lalrinchhana 56’), B. Malsawmzuala, Isaac Lalruatpuia.
Subs: Ephraim Laltlankima, Jerry Lalrinzuala, Lalruatfela, John Lalduhawma, Lalchhanchhuaha Fanai, David Lalrinchhana, Lalchhuanpuia, Lalremruata.
Aizawl FC: Zothanmawia, Jonathan Lalruatkima, Ricky Lallawmawma, Lalrinzuala Khiangte, Brandon Vanlalremdika, Rohmingthanga, Vanlalduatsanga, F. Lalremsanga (Albert Zohmingmawia 46’), B. Zoramthara (H. Lalbiakthanga 82’), Bright Middleton Mends, Lallawmzuala.
Subs: Sangtluanga, Lalhriatrenga, Lalramhmunmawia, Lalthakima, H. Lalbiakthanga, Vanlalthazuala, Jonathan Lalrawngbawla, Albert Zohmingmawia, Eniwo Benjamin Onome.