Chelsea coach Roberto Di Matteo chuan USA a pre-season tour an neih zawh hnuin a player te inhliam belh an awm lo a, season thar ṭan hun an nghahhlelh tawh thu  puang ta rup mai.

USA ah hian ‘The Blues’ hi an che ropui lo a, Seattle Sounders chu 4-2 in hneh mahse PSG nen an inhnehtawk a, MLS All-Stars leh AC Milan an hneh lo bawk a ni. Hei hi manager tân chuan a lawmawm lutuk lo maithei a, mahse Di Matteo chuan a eng zawnga thlirin, a player pawimawhte zingah tumah inhliam an awm lo chu lawmawm a tih thu a sawi.

“Tunhnai kar hnih chhung chu summer break zawha kan inhmuhkhawm lehna hmasa te a la ni a, training kan nei ṭan a, chutah USA ah kan kal nghal a, season thar atana kan inbuatsaihna hi a bul kan la ṭan chauh a ni. Kan thawkrim a, America-a training bungrua ṭha tak tak kan hmang thei a, a tirah inkhelh harsa ti deuh mah ila hma kan sawn tawh hle a ni.

“Kan zinkual nasa a, player te rawn lêt hun a inang lo nuaih bawk a. Euro 2012 a khel ten pre-season a lo khel tawh sa an rawn zawm a, player te fitness pawh a inang lo nuaih a ni. Chutichung chuan team ṭha tak tak kan tum a, player te mai bakah coaching staff te pawhin harsa tih chang kan nei ve ṭhin. Mahse tunah chuan kan kalpel tawh a, tumah inhliam lo a kan tour kan zo thei hi a lawmawm hle a ni. Tunah chuan pre-season match dang kan khelh leh tur piahlamah, season tak tak ṭan hun pawh kan nghakhlel tawh hle a ni.” tiin Chelsea official website a hrilh.

US tour ah hian result nei ṭha lo mahse a player te chuan insiamṭhatna hun an la ngah a, training na mai bakah friendly match an khelh leh turah te a mittlung tura ṭanlakna hun an la neih thu a sawi. Di Matteo chuan, “Kan result ah a ṭha lai leh a chhe lai a awm a, a pumpuia lakin kan duhthu chu a sam lo deuh a ni. Mahse thil kal tawh chu thil kal tawh a ni a, season ṭan ni a inring nghal thei turin kan inbuatsaih ang.

“Player te tân chuan training te, friendly match te hi a ṭangkai em em a, Inrinni ah pawh game ṭang tak ka beisei dawn a ni. Player ṭhenkhat, minute 90 chhung khelhtir ngei duh ka nei nual a, chuvangin US ang em em kha chuan substitution pawh ka siam tam dawn lo a ni.” a ti.

FA Cup 2012 champion Chelsea hian Inrinni-ah Brighton nen friendly match an khel dawn a, hei hi pre-season a friendly match an khelh hnuhnun ber a ni ang. An match dawt leh chu a khirh ṭalh tawh dawn a, Premier League champion Manchester City nen Community Shield inchuhin an intum dawn a ni.

Champions League champion lai an ni a, FA Cup ah an champion bawk a. Player te tân chuan champion lai ni chunga heng tournament khelh thuai thuai a chakawm duh khawp ang a. Anni ai mahin Chelsea fans ten an nghakhlel lehzual ang.