Vawiina Round 6 inkhelh hnuhnung zawkah Team tangrual leh fans nei ngah tak Reitlang FC-in team tha zawka ngaih FC RS Annexe 2-0 in an hneh a, table-ah pathumna an ni ta ! Reitlang FC tana goal thun tute hi H.Lianzama leh Vannunmawia Vanchhawng te an ni a. Tihian Reitlang FC hian Aizawl FC nen point 11 ve ve an hmu a mahse Goal Forward an neih tlem zawk avangin AFC hnuaiah an awm a ni. Match hnuhnung berah Reitlang FC hian Theiriat FC an tum dawn a, an chak anih chuan an qualify ang. RS Annexe erawhin College Veng FC an tum ang.

Inkhelh hma chanchin
Reitlang FC hi inkhelh hmain table-ah pangana an ni a, qualify an duh anih chuan an chak ngei ngei a ngai dawn a, draw thei an ni tawh lova, chuvang chuan an tang hle a ni. An striker tlanchak H.Lianzama (Zama) bawk hmatawngah rawn dahin, amah thlawp turinVannunmawia Vanchhawng (Nuntea) dah a ni a. Midfield laiah Captain Zion-a leh Muanawma te awmin a sirah Hruaizela leh Tlankima te an awm a. Defence laiah Simon-a leh Ruatkima an awm a, a sirah Jerry-a leh Thazuala te an awm thung a. Duh angin bench lamah players an nei tha tawk lova, mahse a players neihchhun ang ang te hi Coach Chawnga’n a hmang thiam hle a ni. Tin, an fans te avang hian players 12-in an khel a tih theih.

FC RS Annexe lam hian chak loh zawn an duh lova, Chanmari FC hneh lo hlim an ni a, chak an tum hle a. Hmatawngah Danny-a rawn dahin Zosangliana erawh an awl tir a, chak loh a hlauhawm avangin fimkhur takin Coach Tawia’n a rawn rem a. Midfield-ah players a rawn dah hnem a. Zonunmawia chu Danny-a thlawp turin a dah a. Midfield laiah players tha pahnih Chta leh Sawmtea awmin a sirah Lalhmangaiha leh Jerry-a te an awm a. Defence laiah Captain Sangsanga leh Zemawia te an awm a, a sirah Siamthara leh Zorema an awm thung.

First half : RS Annexe-in an khel tha !
Game tan a ni a, rin aiin an inhnehtawk a. An innawr tawn a, chance mumal an nei thei lo ve ve a, mahse chak loh an duh lova, an tang hle a ni. RS Annexe hian half chance an nei a, mahse an pet over hlauh a. Reitlang FC paw’n an striker tlan chak Zama hmangin half chance an nei a, mahse a goal bik lova.

RS Annexe midfielder taima Chta a khel tha a, a khel a hmuhnawm a. Tin, winger Tlankima a langsar bawk a. Chance a nei a, a pet out a. Danny-a pawh a tal na a mahse Simon-a te’n chance an pe duh meuh lo a ni. Reitlang FC midfielder Muanawma box pawn atang kawh takin a shot a, mahse keeper in a lo dang hman hlauh a ni. Hemi hnu lawk hian Annexe midfielder Sawmtea’n chance a rawn nei a, bar a rawn pet per a. Annexe striker Danny-a a inhliam a, Sangliana’n a rawn thlak a. Danny-a inhliam hi Annexe-in an tuar a tih theih.

Second half : Fans tanpuinain Reitlang FC in goal 2 an thun !
Reitlang FC fans te hi duh angin first half-ah an au tam lova, players te paw’n kan khel that loh phah tiin Coach Chawnga an hrilh a. Coach chuan fans te hnenah an theihtawpa au turin a ngen a. Inkhel an tan chiah a, Reitlang FC fans te an rawn phur thar a, an rawn au a, an rawn zai dual dual a. “Awle, awle, awle…Reitlang FC kan chak zel dawn” tiin an rawn au a. Reitlang FC te’n bul an rawn tan tha a. First half khel tha zawk Annexe an bet ta zawk a.

Minute 53 naah Reitlang FC-in H.Lianzama hmangin goal hmahruai an thun a. Annexe keeper-in ball a man pial a, chumi tla chu Zama hian a lo pet goal a. Reitlang FC fans leh players te an lawm a, fans te an ‘sapatal’ a ni ber mai. Reitlang FC fans hian 1-0 a hma an hruai hnu phei hi chuan “MPL MPL..” tiin an au a, MPL an khelh theih an ring der tawh a ni. Fans te an au ring tual tual a, players an phur thar zel bawk a. An nawr chhunzawm zel a.

RS Annexe lam paw’n an captain, an defender nibawk Sangsanga lachhuakin an nawr a, pet goal an tum hle a. Half chance an nei a, mahse clear chance erawh an nei thei meuh lova. Hemi hnu hi chuan Reitlang FC lamin chance an ngah tawh zawk a. Striker Nuntea a hlauhawm thei hle a. Chance tha tak tak a nei a. Goal post a pet per a. Hemi hnu hian Nuntea hian a pet goal dawn emaw tih laiin mawi lutukin keeper in a lo nam out hman hlauh a, goal se chuan a mawi khawp ang le.

Annexe lam hian defender 3 chiah an dah tawh si a, Reitlang Fc te an hlauhawm thei hle a ni. Annexe lamin an nawr a, mahse an pet goal thei meuh lova. Reitlang FC lamin Zama hmangin goal an thun leh tep a. Zama’n hian box chhung atang a pet over a ni. Bench atanga rawn lut Hriatpuia chuan counter attack atang ball a khalh lut a, Zama emaw Nuntea a pe dawn emaw tih laiin a pet over a, chan loha awm Nuntea emaw Zama pe se chuan a goal mah na !

1-0 in Reitlang FC hi an chak mai dawn emaw tih laiin injury time-ah counter attack atang Reitlang FC hian an nawr let leh a. Nuntea chuan ball khalh tlangin keeper a bum a, pet goal a.Thawm a tha kher mai ! Reitlang FC fans te chu “MPL MPL..” tiin an au dual dual a ni. Hun a tawp a, 2-0 in Reitlang FC an chak ta a ni.

Tlangkawmna
Reitlang FC te hian bul an tan tha lova, players nei tha zawka ngaih RS Annexe te’n an nawr zawk a. Mahse second half-ah erawh fans te nen tan rawn lain an rawn phur thar hle a, fans te tanpui nain an chak a tih theih. Fans te’n thahnem an ngaih phawt chuan a khel te an tang lo thei lo ! Tin, Coach Chawnga a fakawm a. A naute a hrechiang a, a hmang thiam em em a ni. Fans te hi awm ta lo se chuan hetiang dinhmun hi an thleng lo mai thei a ni. Chuvang chuan fans te pawh hian fak an phu a, an fans te vang hian player 12-in an khel a tih theih awm e.

RS Annexe hian an khel chhe lova, bul pawh an tan tha a, mahse second half erawh duh angin an khel tha thei lova, an chak ta lo a ni. An striker pawimawh Danny-a inhliam an tuar a tih theih a. Tin, an first choice goalkeeper Rinsanga khel lo an tuar a tih theih bawk. Goal hmasa zawk kha keeper tihsual a ni a. Goal kha lut ta lo se chuan an in draw tlang mai pawh a rinawm a ni. Annexe hi an la tla lova, an match hnuhnung berah an chak chuan an la qualify thei dawn a ni. Chutih rualin naktuka inkhel tur Kanan FC inkhel result-ah an innghat bawk.

Match Statistics
Reitlang FC 2-0 FC RS Annexe
(Vanunmawia Vanchhawng 90+3 & H.Lianzama 53′)

Match Statistics

Table