A vanglaia khawvela defender tha ber tia sawi ngam Alessandro Nesta chuan free transfer-in AC Milan atang Major League Soccer (MLS) club Montreal Impact a zawm dawn ta. A hlawh zat tur leh an inbiak rem dan erawh engmah tarlan a ni lova, mahse Designated Player-a chhiar tel a ni lo a ni.

Kum 36 a upa Nesta hian a vanglai hun chu AC Milan-ah hmang a, kum 10 chhung zet a khel a ni. Milan-a a khelh hma hian Lazio-ah kum 9 zet a khel bawk a ni. Tunah a club pathumna tur Canadian club Montreal Impact a zawm dawn ta a, Jersey no 14 a ha ang.

Designated player rule hi ‘Beckham rule’ tih a ni bawk a. A awmzia ber chu MLS team te hian kum khat atan an players hlawh tur hi an bithliah thlap a. Khatang tang khan players te hlawh hi an semkual thin a ni a. Mahse he dan hian Designated player te chu a huam ve lova, hlawh sang zawk an nei thei a, club ropui leh hausaa khel te hlawh ang zat an hlawh ve theih phah thin a ni.

Dutch club Feyenoord chuan kum 13 zet an champion tawh loh avangin season tharah champion an tum ruh hle a. 1998-1999 season-a an champion bak kha an la champion leh lo a ni. Norwegien midfielder, India thisen kai Harmeet Singh chu Norwegien club Valerenga atang an lei a ni. An leina man hi a to lo hle a, €400,000 niin media lamin an chhuah a ni. Kum hnih chhung contract hi ziahpui phawt a ni a, a chetthat dan azirin kum hnih dang pawh a cham leh mai thei a ni.

Feyenoord hian an midfielder Karim El Ahmadi-in Aston Villa-a a chhuhsan hnuah amah thlaktu tur hi an zawng a, kumin November-a kum 22 tling tur Harmeet Singh hi an la ta a ni. Sporting director Martin van Geel chuan “Harmeet Singh kan la thei hi a lawmawm a, kan scout te’n hun rei tak chu an enthla tawh a, a talented em em a ni. El Ahmadi nen pawh hian tehkhin theih a ni a, kan thatpui ngei ka ring a ni.” tiin a sawi.

Harmeet Singh hian ram tan vawi thum chiah a la khel a, a club Valerenga tan erawh official match 100 chuang a khel hman a ni. Harmeet Singh position hi midfield a ni a, mahse defensive, attacker leh winger ang paw’n a hman theih vek a ni. Kan hriat angin Feyenoord hi club hlun leh ropui thin a ni a. Champions League leh Europa League-ah te lo champion tawhin Europe-ah ro an lo rel tawh thin a ni.

Premier League atang relegate mah se Blackburn Rovers chuan tan an la chhunzawm zel a. Portuguese player Fabio Nunes chu Portimonese SC atang an lei a, an leina man hi puanzar a ni lo a ni. Kum 19 a upa Fabio Nunes hi striker ni a, a Portuguese pui Nuno Gomes-a hnung zuiin Blackburn hi a zawm a ni. Tin, Portuguese striker tho Nuno Gomes chuan Portuguese club Braga chhuahsanin kartir khan Blackburn hi kum hnih chhung atan a zawm tawh bawk a ni.

Nuno Gomes hi a vanglai chuan Europe-a striker tha ber pawla sawi a ni thin a. Euro 2000 ah phei kha chuan hming a rawn chher hle a nih kha. Ram tan vawi 79 khel tawhin goal 29 zet a thun tawh a ni. Kum 36 a ni tawh a, a upat tawh avangin duh angin a tha thei tawh lo a ni. Chutih rualin Blackburn lamin remchangah lain an lo lei hmak a ni. Blackburn hi an tang hle a, Fabio Nunes leh Nuno Gomes hma hian Danny Murphy leh Leon Best te an lo lei tawh a, Premier League khelh leh an tum hle a ni.

Russian striker pasang Pavel Pogrebnyak chuan Stuttgart chhuahsanin Premier League club Reading a zawm dawn ta. Kum 28-a upa Pavel Pogrebnyak hian kumin kumtir khan loan-in Fulham-ah a khel a, a chettha zia chu sawi ngai lovin kan hre awm e. Match 12-ah goal 6 a thun a ni.

Reading-ah hian kum 4 chhung atan contract a ziak a, kar khatah £65,000 a hlawh dawn a ni. Reading hian Pavel Pogrebnyak an lak hma hian Nottingham Forest winger Garath McCleary leh Newcastle midfielder Danny Guthrie te an lo la tawh bawk a. August ni 18 hian Premier League-ah Stoke City an lo mikhual dawn a ni.

Pavel Pogrebnyak hian Reading a luh hma hian heng club-ah te hian a khel tawh a ni. Spartak Moscow, Baltika Kaliningrad (loan), FC Khimki (loan), Shinnik Yaroslavl (loan), Tom Tomsk, Zenit St Petersburg, Stuttgart, Fulham.

Tottenham Hotspur paw’n Andre Villas-Boas hnuaiah tan an la thar zel a, an centre back Steven Caulker chu kum 4 chhung contract an ziahpui leh a ni. Steven Caulker hi kum 20 chauh a la ni a, 2007 khan Spurs Academy a zawm a, 2008 khan Spurs-ah hian a contract sign in, a professional career a tan a ni. Mahse Spurs tan hian khelhna chance a nei meuh lova. Vawikhat chiah a la khel a. Carling Cup,2010 a Arsenal an hneh loh tum chauh khan a la khel a ni. 2009 atang club hrang hrangah loan in a chhuak a. Yeovil, Bristol City leh Swansea-ah te a khel hman a ni.

Tunah hian Great Britain Olympic squad-ah a tel a, England U-21 tan chuan regular takin a khel thung a ni. Spurs boss thar Andre Villas-Boas chuan players naupang tak tak chherchhuah a, team tha tak din a tum a. Hei vang hian Steven Caulker pawh hi contract an ziahpui leh a ni.

Newcastle goalkeeper Celtics-a loan khel mek Fraser Forster chuan Celtics a zawm fel ta. Kum 4 chhung atan contract a ziak a ni. A man zat hi £2m nia tarlan a ni a. 2016 thleng Scottish Club tan hian a khel dawn a ni. Foster hian Celtics tan hian loan-in season hnih chu a khel tawh a, match 90 lai a khel tawh a ni. Foster hi Celtics champion-na kawnga player pawimawh leh thawhhlawk ber pawl a ni a.

Fraser Forster chuan “Team ang leh mimal angin chawimawina tam thei ang ber lak ka duh a, Celtics-ah ngei chu chu ka hlawhchhuak thei dawn a ni. Players leh Coach te nen kan thawh hona a tha a, he team hi nuam ka ti a ni” tiin a sawi.

Celtic manager Neil Lennon chuan Foster chu “top class keeper” anih thu a sawi rualin a team tichaktu anih thu a sawi bawk.