Football lam a tui mi leh a bik takin Arsenal supporters (Gooners) te chuan George Graham chanchin leh Arsenal mi ropui a ni tih chu kan hre vekin a rinawm a. Arsenal tana player leh coach anga mi ropui a ni tih pawh ka hre vek awm e.

George Graham hi a hringnun kawng bul tanna chu a hniam ve hle  mai. Vanduaina hrang hrangin a tlakbuak a, thla 1 pawh a tlin hmain  a pa in a boralsan a, chutah a unaunu in a boral san leh bawk a. A nu chuan baihvai takin a hmeithai pui a, harsa takin a naupan lai hun chu a hmang ve a ni.

Hun harsa tak karah tumruhna nen a thang chho a, inkhelh a thiam em avangin rawlthar a nih meuh chuan England rama club lian ho chuan an inchuh titih ta mai a. Amah hi Scottish ni mahse bul a tanna chu Aston Villa niin kum 17 a tlin ni chiah in Aston Villa hian an player ni turin an la a ni.

Aston Villa ah hian ala naupan avang leh players tha tak tak te an neih avangin vawi 8 chiah a inkhel ve hman a. Aston Villa atang hian Chelsea ah pem leh in chumi hnu ah Arsenal ah kum 1966 khan a lut ta a ni.

Arsenal ah hian mi lawm a hlawh in a khel phak chho ta char char a. A luh kum 1966–67 leh 1967–68 season ah te chuan Arsenal tana pet goal hnem ber a ni ta mai a! Arsenal-a a khelh chhung hian Inter-Cities Fairs Cup (1969–70), First Division League Champion (1970–71) leh FA Cup (1970–71) te a la hman a ni.

Arsenal-a a luh tirh hian Centre Forward angin a khel phawt a, chumi hnu ah chuan Inside Forward an tih mai, Centre Forward hnung chiah ah leh Wing ah te a khel leh a ni. Arsenal tan hian vawi 308 a khel hman a, goal 77 lai a thun hman a ni. 197-72 season ah Arsenal in Forward thar Alan Ball an lalut a, chuta tang chuan Graham hian hmun a chang tlem tial tial a, December 1972 ah chuan Arsenal hmelma Manchester United ah a insawn a ni.

Tun kuma a kum 67na hmang mek Graham hi football a khelh hun chhung a rei lutuk lova, kum 18 vel chauh player niin hun a hmang a. Mahse, football a chawlhsan hnu in club enkawlna hna lam ah a lut leh a. Crystal Palace, QPR leh Millwall te a enkawl hnu ah Arsenal ah bawk chuan Manager ni turin kum 1986 ah chuan a lut leh ta a ni.

Arsenal hian Graham an lakluh hma hian Scotland National Football Team enkawl tura an ruat Alex Ferguson chu lak an tum a, mahse ani hian World Cup zawhah tia a lo chhan avangin Assistant Manager anga lak an tum George Graham chu Manager puitlingah an la ta zawk a ni.

Arsenal hi hun rei tak chhung no mawi chawi lovin an awm tawh a, an chawi hnuhnun ber chu 1978-79 season a FA Cup an lak kha a ni mai a. Graham chuan kalphung thar duang chhuak in kum upa lam ho chu a thuah fai a, kum naupang zawk lalut in Youth Team (Reserve Team) tha tak din chu thupuiah a nei nghal a. Enkawlna khauh tak hnuaiah a nau te chu a awmtir a, season an zawh meuh chuan league ah 4na an ni phak ta a. Tin, 1986-87 season vek chuan League Cup chu Graham chuan a chawipui nghal a ni.

Graham chuan a player naupang te chu ring tawk chungin a khelh chhoh tir zel a, club Captain atan Tony Adams chu kum 21 mi a nihin a ruat a, hei hian mi sawi pawh a kai hle a ni. Mahse a player naupang a chher ho chu ring chhunzawm zelin Lee Dixon, Tony Adams, Steve Bould leh Nigel Winterburn te chu defence ah huai takin a hmang a, heng ho rual hian kum 10 chuang lai chu Arsenal tlarhnung an hnawh phui a ni.

Arsenal Manager anih chhung hian no mawi vawi duailo a chawi pui a; First Division League Champion tum 2 (1988–89, 1990–91) a nih pui a, League Cup nomawi vawi 2 (1986–87, 1992–93) a chawi pui bawk a. Tin, Community Shield (1991), FA Cup (1992-93) leh UEFA Cup Winners’ Cup (1994) te a chawipui bawk a ni. Heng bakah hian League Cup (1987–88), Community Shield (1989, 1993) leh UEFA Super Cup (1994) ah te Runner-up anih pui bawk.

Arsenal Manager ropui tak ni mahse kum 1995 khan ban a ni a. Hei hi a chhan nia lang chu 1991-92 Season a player pahnih a lei John Jensen leh Pal Lydersen te chu an agent Rune Hauge hnen atanga heng player pahnih te a lakluh avanga thamna angreng £425,000 alo lak vang a ni. He thil a tih avang hian Graham chu FA in kum 1 khat football a in hnamhnawih lo turin a hrem nghe nghe a ni.