Mizoram infiamna khawvela sum tamna ber tur, Mizoram Premier League chu October chawhnu lama khelh ṭan tur a ni a, sponsor-tu hming chawiin Mahindra 2 Wheelers Mizoram Premier League tih a ni ang.

September 1, 2012 khan Mizoram Football Association leh an thawhpui Zonet Cable TV chuan Hotel Regency, Zarkawtah MPL-a khel tur club aiawhte a ko khawm a, he hunah hian commercial leh publicity lama inkaihhruainate leh club-te hamṭhatna tur lam zirho a ni a, MPL kalphung tur thil tam tak sawi lan a ni bawk.

Zonet Cable TV aiawhte’n MPL club-te’n an club chanchin an puanzar dan tur te, an club bikin TV kal tlanga ‘fakna’ an chhuah theih dan turte leh a ṭha zawnga club inpho lan dan turte an sawipui . Hei mai bakah hian footballer-te’n TV interview an hmachhawn dan tur te, media hmaa thil sawi awm leh awm lote inzirtir ṭul tih a nih thu sawi chhuah a ni a, club-in he lam kawngah hian mahni player-te ṭheuh lo zirtir se, an duh thu an sawi a, TV production crew pawhin training tha tak nerih an tum thute an sawi.

MPL-a khel turte hming, kum, position leh an chanchin record tura theh luh dan tur kimchangte inhrilh hriat a ni a; record dik leh felfai tak vawn a nih theihna tura tih tur pawimawhte sawi chhuah a ni bawk.

Football website www.zofooty.com lam pawhin internet kal tlanga club chanchinthar puanzar zung zung a nih theih dan turte an sawi a, club hruaitute nen ṭha taka thawkhoa hmalak dan tur an duante an sawi chhuak bawk. ZoFooty.com hian September thla chhung hian an website hmel thar pholan hman an tum a, hetah hian MPL bik changtlung taka ziahna leh chhinchhiahna, sawihona thlenga dah tel an tum bawk a ni.

MFA aiawhte chuan club hruaitute nena commercial leh publicity lam sawihona bakah hian footballer leh club management staff-te nena inkawmna hun an buatsaih tur thu an sawi a; hun remchang hmasa berah MPL-a registered player zawng zawng, coaching staff-te leh club hruaitute nen ko kim taka inkohkhawm an tum a, he hunah hian players nungchang, match official-te laka chet dan mawi, khelmual chhung leh pawna football players leh management staff-te hriat turte sawi lan a ni thung ang.

MPL-a hman tur bik lehkhabute (booklet)buatsaih a ni dawn a, hetah hian dan leh hrai bakah hriat tur pawimawhte tarlan vek a ni ang.

MFA hruaitu lam chuan inkhel en man aṭanga a tam thei ang ber hi football club-te hnena pek a nih tur thu an sawi bawk a, ticket hralh leh zawrh dan chungchangah hian rawtna nei duh apiangte chu ziaka MFA Office-a thehlut turin an ngen. Football club-te’n hlawkna an chan theihna tura tihdan ṭha, Mizorama a taka hman theih tur rawtna thlen turin MPL club hruaitute bakah mipuite pawh an sawm a; MFA lam zir chianna piah lamah rawtna lut a awm a nih chuan chumi bawhzui chuan ticket zawrh, hralh leh a kalpui dan tur hrim hrim hi ngaihtuah a la ni ang.

Hetihlai hian MFA-in a din, Mizoram Premier League Board tun hnaia ṭhukhawm chuan player ziah luh chungchangah September 7 hmain player pathum thlenga thlak/tihdanglam/ziah belh hun a hawng a, squad erawh 30 aiin an tam thei chuang lo ang. Hei hi club ṭhenkhatin Under 19 player pathum tal neih tur an lo la tihfel kim loh tihfelna remchangah hman nghal tur a ni bawk. MPL-ah hian inkhelh ni-a squad 20 zingah Under 19 player pathum tal an awm ziah tura tih a ni a, hei hi youth development lama ṭan lakna chi khat a ni a, player naupang zawk chher hriamna tura duan a ni.

Tarlan tawh angin MPL-ah hian inkhelh apiangin a chak zawkin Rs 3,000 an hlawh ziah ang a, a chak lo zawkin Rs 2,000 an dawng tho ang. Inkhel en man atangin club-in chan an nei ang a, hei bakah hian season tawpah a hnuaia mi ang hian club tan lawmman a awm:
Champion – Rs. 5,00,000
Runner Up – Rs. 3,00,000
3rd Place – Rs. 2,00,000
4th Place – Rs. 1,50,000
5th Place – Rs. 1,25,000
6th Place – Rs. 1,00,000
7th Place – Rs. 75,000
8th Place – Rs. 50,000