Spain striker Fernando Llorente chuan a khelh mekna Athletic Bilbao ah contract thar a ziak duh lo tih club thuneitute chuan an puang.

Thawhṭanni khan Bilbao President Josu Urrutia chuan a ‘star striker’ chungchang hi sawiin, ni engemawzat liamta khan Llorente hian contract thar a ziah loh tur thu a sawi tawh a, hei hi club tân chuan chânna nasa tak a ni ang a ti. Urrutia chuan, “He club ah hian playr thiam ber ber kan nei hauh lo a, mahse thawhrimna leh inpekna kawngah chuan kan player te tluk an awm bik lo. Keini chuan player te hi pawisa siam nana hman kan duh lo a, he club ah hian an career hmang zo thei se kan ti zawk a ni.” tiin Llorente chu awlsam taka hralh mai a tum loh thu a sawi.

Kum 27 a upa Llorente hi Athletic Bilbao ah kum 10 a nih aṭangin a awm tawh a, June 2013 thleng chauh contract a neih tawh avangin nakumah ‘free agent’ a ni ang a,a duh duh na-ah a kal thei tawh ang. Urrutia hian Llorente hralh an tum loh thu sawi nghal mahse Athletic Bilbao aṭang hian a mai par thlawn tawp a rinawm loh a, tunkum nipui transfer season tâwp hma ngeiin club thar a neih hman a rinawm zawk mah a ni.

Athletic Bilbao ah kum 17 a awm tawh a, youth academy ah kum 7 a intuaihriam hnuin, kum 2003-04 season ah Bilbao youth team Baskonia aṭangin bul a ṭan a, 2004-05 ah Athletic Bilbao B team tân a khel zuai bawk. Hemi kum vek hian first team ah hlankai nghal niin hnunglam a hawi leh tawh lo a. Match 297 ah goal 122 thun tawhin, Athletic Bilbao striker awm tawh zinga ropui ber pawl a ni ta zawk a ni.

Fernando Llorente lei duh zingah Italian champion Juventus chu a langsar ber an ni a, euro maktaduai 20 thlengin an inhuam tawh niin report a awm. Chelsea in Didier Drogba thlâk nan lei an tum tih thawm a awm a, Arsenal in Robin van Persie an hralh chuan an lei thut maithei bawk. Manchester United in van Persie an lei theih loha ‘back up’ plan ah an dah tih te thlengin report a awm a, mahse Juventus bak hi chu thuchiang a awm rih lo. Llorente hi Athletic Bilbao in an hralh phal a nih chuan lei duhtu a tlachham dawn lo a, a man pawh a tlawm vak dawn lo tih erawh a chiang e.

Euro 2012 champion Spain team ah a tel a, Marcelo Bielsa enkawlna hnuaiah season hmasa khan Athletic Bilbao chu Europa League leh Spanish Cup final luhpui ve ve in, final ah hian a chak lo zawkah an ṭang ve ve hlauh thung. A vanglai a hmang mek a, a palen, tharum ngah leh finishing ṭhat avangin Europe-a striker langsar pawl a ni pha tawh a. Champions League khelh a duh ve ang a, a inkhelh chhungin champion medal dawn ve a duh ang. Llorente tân Athletic Bilbao a tê hret tawh a tih theih a, a duh ang pe thei tu tur nia a rin, club lian zawka a chhuah hun a thleng ve dawn ta niin a lang. Hmasâwn duh chuan kan thlakhlelh ngawih ngawihte kalsan a, chona thar hmachhawn a ṭul fo reng a, hei hi football a ni a, hei hi hringnun a ni e.