Mizoram Football Association (MFA) in Mizoram State Sports Council (MSSC) puihnaa a huaihawt Football Coach Education Programme, ni 8 awh chu Inrinni zan khan khar a ni ta. He Programme hnuaiah hian District hrang hrang atanga thlanchhuah mi 20 te chuan British coach Hugh Kim Lewis hnuaiah Level ‘D’ coaching course an zir chhuak a, an vai hian theory an pass vek a, practical paltlang zo lo erawh mi tlemte an awm. India ramah Mizote chiah he Course a inzirte zinga theory exam paltlang vek awmchhun an la ni.
Kharna inkhawmah hian Health Minister Pu Lalrinliana Sailo, MFA Patron ni bawk chu khuallian a ni a, zir chhuakte hnenah Level ‘D’ Certificate a sem a; MFA in hetiang programme a huaihawt chu lawmawm a tihzia leh Association hruaitute remhriatna leh thawhhona chu fakawm a tih thu a sawi bawk a ni.
Ni 8 chhung vel Mizo football coach te khauh leh uluk taka kaihruaitu, football coaching a UEFA ‘A’ License nei pha ngat, Sap pachal Hugh Kim Lewis chuan Mizote chu rilru paukhauh, rilru chak leh an thil zir thiam chak tak nia a hmuh thute a sawi a. Hei hi eng infiamnaah pawh thil pawimawh ber pakhat a ni tih sawiin, Mizote chu tawng chhuak lova hawihera thil inhrilhtawn thiam tak an ni tih a sawi bawk a ni. Hugh Lewis chuan tuna coach 20 te hian midangte zirtir chhunzawm ve zel se a duh thu leh hmalam pana an thiamna tipung zel tura inzir chhunzawm zel an mamawh thute a sawi bawk. Hugh Lewis chuan Mizote fakin “India ram khawpui hrang hranga course ka pek tawhnaah an vaia theory exam pass vek an la awm ngai lova, Mizo te chiahin an la pass kim a ni,” a ti.
Bangalore-a inkulh, Sports lam buaipuitu lian SPT Sports neitupa Pu Amit Saran pawhin UEFA ‘A’ License nei phak, Hugh Lewis te angin Mizoram a training a rawn pe thei chu thil lawmawm tak a ni tih sawiin SPT Sports leh MFA chu thawk dun zel thei se a duh tih a sawi a. Bangalore-a an hmunpuiah pawh Mizo coach te kum 2 vel tal rawn inzir chhunzawm se a duh thu a sawi bawk.
Coach Education programme a tel upa ber Pu NL Thanga, Champhai, kum 59 a upa chuan Hugh Lewis-an a kaihhruai dan chu faktlak a ni tih a sawi a. A taimak zia te, a uluk zia leh a tih mai mai lohzia te sawiin, entawntlak a tihzia a sawi a ni.
Coach Education kharna inkhawmah hian Parliamentary Secretary Pu Lal Thanzara, MFA President leh Pu Rotluanga Fanai, Vice President, MSSC te pawh an tel a ni.
Source: Zosports ‘Kan ram tan’
a ropui e…kan ram in a kan mamoh a ni… a aia level sang zawk zir zawm thei chuan han tihzawm se, tin, tuna mi te pawh hi an tangkai dawn lutuk e. Kan ramah hian talent chu a awm tih a hriat a, coaching system leh infrastructure neihthat hi a pawimawh a ni
Mizo Coach hnuaiah Mizo Player-ten I-League hi khel thuai teh se….