Independence Day Celebration Invitation Football Tournament khelh chhunzawm zel a ni a. Vawiin hi ni 10-na leh group stage match hnuhnung ber a ni a. Match hmasa zawkah FC RS Annexe in 2-0 in Oil India Ltd. (Duliajan), Assam an hneh a. Danny Lalduhsaka’n goal hnih a thun a. Match hnuhnung zawkah FC Kulikawn-in 2-0 in Chanmari FC an hneh a, goal thuntute hi Lalhunchhunga (Lachuma) leh Lalrintluanga Hauhnar te an ni.

Tihian Group B atang FC Kulikawn leh Chanmari FC in Semifinal an lut a, point 7 ve ve an hmu a, mahse head to head-ah FC Kulikawn an chak zawk avangin FC Kulikawn hi Group A ah an sang ta ber a ni. Inrinni chawhnu dar 1 hian AR Lammual-ah Chanmari FC in Aizawl FC an tum ang a, match hnuhnung zawk, dar 3 ah FC Kulikawn leh Mizoram Police an intum thung ang.

First match : FC RS ANNEXE 2-0 OIL INDIA
(Danny Lalduhsaka 9′ & 70′)

FC RS Annexe hian chak an mamawh a, FC Kulikawn result-a an innghah rualin an chak ve tho angai a, chak an tum hle a ni. 4-4-2 formation hmang mah se striker 3 an dah lut a, Sangliana winger angin an hmang a, Ctea leh Danny-a hmatawngah an dah thung a. Captain Sangsanga aiah Marintea dah luh a ni bawk. Oil India lam hi tla tawh an ni a, mahse point box nih an duh lova, chak an tum ve hle a ni. Bordoloi Cup khel tur an nih avangin an tan chuan I-Day hi inenchhin nan an hmang a, selection anga hman theih anih avangin players te pawh an inthlahdah ngam meuh lo a ni.

Tute nge khel?
FC RS Annexe : Rinsanga (GK), Rinchhana, Marintea, Zemawia, Zorema (Captain), Chta, Sawmtea (Zonunmawia), Jerry, Sangliana, Ctea (Vanlalhmangaiha), Danny
Oil India : Prandeep (GK), Ragui Singh, Manoj Gogoi, C.K Basumatary, Sishuram Chutia, Mintu, Remruata (Captain), Zaia, P.Choudhary (Wary), Jayanta (Birjab), Bhimkanta Sonowal

Inkhel chanchin
FC RS Annexe hi beisei la nei an ni a, chutih rualin Oil India erawh tla tawh an ni thung. Oil India hi tla tawh ni mah se atir atang an tang a, mahse tla tawh annihna a lang leh thin. Annexe erawh beisei la nei an nih avangin an tang hle a, chak pawh an tum a ni. Minute 9 naah Annexe lamin penalty atang goal an thun a, Striker tha Danny Lalduhsaka’n a pet goal a. Annexe fans te thawm a tha kher mai. Annexe lam an tang zel a, Oil India an nawr a. Oil India lam paw’n an siphurh sut an tum ve reng a, mahse chance an nei thei meuh lo. Midfield battle a hmuhnawm a, Oil India Zaia duh angin a fit lova, mahse a ball khawih a la dik hle. Oil India Captain Remruata paw’n midfield a uap hneh khawp mai. Annexe midfielder pahnih Chta leh Sawmte an kheltha viau bawk.

Second half-ah Oil India lamin an nawr a, an siphurh sut an tum hle a. Mahse an fitness that loh an tuar a, duh angin long ball an inpe ngam lova, clear chance an nei thei meuh lo. Annexe lamin goal khat a tawk lo tih an hria a, an nawr na hle a. Minute 70 naah Danny-a bawkin goal a thun leh a, he goal hi a ropui hle. Mawi lutukin a ke veilamin a pet goal a ni. Goal dang a luh belh tawh lova, 2-0 in FC RS Annexe an chak ta a ni.

Tlangkawmna
FC RS Annexe te hi chak mah se FC Kulikawn an chak ve tho avangin an tla a, an vanduai tak zet zet a ni. Match 4 khelhah hneh loh an nei lova, match 3 an draw a, match 1 an chak a mahse semifinal an lut zo ta lo a ni. An players te an thawkrim a, an tactical discipline a tha a, hneh loh nei lova an tla erawh an ui khawp ang le. FC Kulikawn an draw kha an tuar a, 2-0 ngawta hma an hruai hnua an inpawhthlak tir kha an tlak phah a tih theih awm e. MPL ah erawh ropui taka rawn comeback an tum bawk. An players te an in man chho tawh a, MPL ah chuan tawh khirh ber pawl an ni ngei ang. Oil India players te hi an vanglaia players tha ber ber te an ni a, mahse Oil India-a an luh hnu hian hna nghet te an nei fur tawh hlawm a, an vanglai an pha tawh lo a tih theih. Vawikhat pawh practice lova rawn kal an ni a, ONGC angin mipuiin an beisei sang lova, mahse match 1 tal pawh chak an neih loh hi chu inenfiah ve viau cu an ngai ang.

Second match : FC KULIKAWN 2-0 CHANMARI FC
(Lalhunchhunga (Lachuma) 32′ ; Lalrintluanga Hauhnar 85′)

FC Kulikawn hi an chak chuan semifinal lut thei an ni a. Chutih rualin RS Annexe an chak tawh avangin draw pawh a thiang tawh lo, an chak ngei ngei angai a ni. RS Annexe chak hian FC Kulikawn tan pressure a pe a, FC Kulikawn vanneihna erawh midang khelha an innghat lo hi a ni. Chak an mamawh a, chak pawh an tum a. An in draw paw’n an tla dawn a, an tang hle a ni. Chanmari FC erawh semifinal lut tawh chiang sa an ni a mahse group leader nih an duh a, chuvang chuan chak emaw draw tal a ngai a ni. Lut tawh an nih avangin squad an siksawi deuh a, players hmelthar kan hmu nawk a ni.

Tute nge khel?
FC Kulikawn : Angaia (GK), Zama, Nunpuia, Notea, Chullova, Ramliana, Bobby, Pipia, Thara (Captain), Lachuma, Chhanhima
Chanmari FC : Awpa (GK), Michael-a, Mamtea, Thangpuia, Zomuana, Chhinga (Captain), Msa, Hlutea, Zonuna, Tluanga, Tat-a

Inkhel chanchin
Inkhelh tantirh atang inkhel a rang a, Chanmari FC lamin ground ball bawkin an khel a. Mahse inkhel a rei a, high ball-in an khel tam a, an tuar a tih theih. FC Kulikawn erawh chak mamawh an ni a, an tang hle a. Annexe an chak avang ringawtin an chiai lova, tha takin game an khel thei a, an fakawm hle. Minute 32 naah Bobby-a cross tha tak chu Khawzawl player tha Lachuma’n mawi lutukin a lo head goal a, Kulikawn fans te an sapatal a ni ber. Chanmari fans aiin Annexe fans an lungngai zawk a. A chhan chu Chanmari FC chu lut tawh an ni a, Annexe erawh Kulikawn chak loh emaw in draw chauha lut thei an ni a, hei vang hian Chanmari FC an tan ta hle a ni.

Second half-ah Chanmari FC lam hian an sihphur sut an tum a. Lawmtea, Sawmtea leh Rinchhana te an luhtir a, mahse FC Kulikawn an khel tha a, chak an mamawh em avangin an tang a, Chanmari FC lam hian an siphurh an sut thei bik lo a ni. Semifinal lut tawh leh luh tum inkhel an ni a, lut tawh tang ai chuan luh tum tang chu an tang tak tak deuhvin a lang. FC RS Annexe leh Chanmari FC fans te’n Chanmari FC players te an au a, mahse Chanmari FC lamin an pet goal thei meuh lo. Minute 85 naah Chanmari FC leh Annexe te beiseina ti thamral turin bench atanga rawn lut Rintluanga’n FC Kulikawn tan a rawn pet goal leh a, 2-0 a ni a. FC Kulikawn-in semifinal an lut a ni der tawh mai. Minute 5 chhungin Chanmari FC lamin an siphurh an sut thei lova, 2-0 in FC Kulikawn an chak a, Semifinal an in pet tling ta a ni.

Tlangkawmna
FC Kulikawn hian bul an tan tha lova, an match hmasa berah Luangmual FC in 4-1 ngawtin an sawp a. Mahse an chak loh hi tan nan an hmang a, semifinal an luh phah a ni ber. An players tha tam tak te’n an chhuahsan a, mahse players tha dang an lalut a, an chher bawk a, players an la nei tha em em tho a ni. An fighting spirit a tha a, an thawkrim a, players mai bakah coaching staff te an fakawm a ni. Bul tan tha lo mah se an chak chhoh zel avangin an phur thar a, inrintawkna nasa tak an neih belh phah a, semifinal ah pawh tawh an khirh viau ang le.

Chanmari FC hian MPL playoff ang bawkin bul an tan tha a, an group atang paw’n semifinal lut hmasa ber an ni nghe nghe. Bul an tan that avangin an match hnuhnung ber hi chu players naupang zawk te khelh nan an hmang thei a, semifinal an khelh dawn avangin an players thenkhat an awltir theih phah a ni. Mahse game khelh that laklawh laia chak loh hi mi tam takin an duh loh a ni a. Vawiinah an chak lova, hei hi semifinal-ah an chak loh phah ang em tih hi zawhna lian tak a ni. Club tam tak chuan lut tawh pawh ni mah se chak vek an duh a, chak kaltluan laia chak loh hi an duh loh thin a ni.

Chanmari FC leh FC Kulikawn te hian semifinal ah an tumpuite hnehin final-ah an intum leh thei ang em? Enge kan ngaih ve dan le?