Manchester United chuan an home Old Trafford-ah Aston Villa 4-0 a sawpin Manchester City nen point 5 ngawtin an inthlau leh ta a ni. Man Utd tan hian Rooney in goal hnih a thun bakah Welbeck leh Nani ten goal khat ve ve an thun bawk. Man Utd hi chak chiang viauin lang mahse inkhel tan tira Ashley Young penalty hmuh chuan sawisela hlawh leh ngei ang le.

Inkhel pawimawh!
Man United tan Champion tur chuan chak a pawimawh tawh a, Aston Villa tan pawh a him china awm duh chuan draw tal a pawimawh bawk. United lamin Wigan an hnehloh tuma an chawlh tir Paul Scholes an ko kir a, Phil Jones leh Hernandez aiah Danny Welbeck leh Rafael in first eleven an rawn chang bawk. Aston Villa pawn mi pahnih an thlak thung a, Stephen Warnock leh Chris Herd aiah Eric Lichaj leh Ciaran Clark an rawn luhtir thung.

First Half-ah Penalty sawisel kai hmangin United in hma an hruai!
Inkhel an tan a, chance nei hmasa zawk chu Aston Villa an ni a. Mahse Wiemann an goal-ah a chantir thei tlatlo. Hemi zawh hnu hi chuan United an chungnung zawk a, minute 5 lekah Aston Villa atanga United in an lak Ashley Young-a’n veilam atanga ball rawn la lut chu, penalty area-ah Ciaran Clark in a lo ti tlu a. Referee Halsey chuan penalty pe in, Rooney chuan goal-ah a chantir chiang hle. Mahse he penalty hi a awm em tih chu zawhna awm thei tak a ni. Replay atanga a landan chuan Young hian Clark a ke ah hian a in pal lui niin a ngaih theih a, chumai bakah Young hian a ball lak per hi a lak phak dawn tawhloh avangin a in pal luiah a ngaih theih bawk. Engpawhchunise referee in a hmu chiang a, Clark-an a khawih fuh ngei bawk avangin penalty hi pek theih tak a ni lawi si. Mahse United tanlo tu tan erawh ava na dawn em!

Scholes leh Carrick kaihhruaina hnuaiah United game an thunun chhunawm zel a, goal erawh an thun thei mai biklo. United tan Rooney, Welbeck ten chance tha an thelh a. Winger pahnih Valencia leh Young erawh an khel tha fu. Minute 23 naah United Captain Evra cross chu keeper Shay Given chuan a khawih phakloh bakah Villa defender Nathan Baker chuan a lo clear loh bawk avangin Welbeck chuan harsa lo takin a lo thun a. First Half-ah goal dang a luh belh tawh lo.

2nd half-ah sawisel kailo goal hnih!
Second Half-ah Unitd an chungnung chhunzawm zel a. Mahse goal erawh a rawn thleng mai biklo. Villa tan substitute atanga lo lut Emiley Heskey head tihloh chu De Gea tana han harsa tur a awm lova, United erawh a khat tawkin an hlauawm reng thung. Tunhnai United game a player pawimawh bera chhal ngam Valencia ball tha tak chu Rooney chuan goalah a chantir a, hei bakah hian Ashley Yound rawn thlaktu Nani-an hun pek belhah Johny Evans ball pek chu awlsam takin a lo thun bawk. Goal dang a luh belh tawh loh avangin United chuan City nena an inthlauhna chu point 5-ah an dah leh a, hei bakah hian goal difference inthlauhna an ti tlem bawk a ni.

Sawi belh ang!
Zu in thinin ka bawnghnute in sawi duh lova, ka zu in chauh hi engngatinge an sawi thin tih ang chiahin United pawhin an penalty hlawh chungchang chu an sawive ngei a rinawm. United hian first half lamah penalty sawisel kai takin goal thun mahse second half-ah ball in Nathan Baker kutah ball in a fuh miau avangin penalty hmu tur a ni lawisi. Mahse United penalty hmuh hi goal khatna a ni tlat a, a lut hma bawk si a, Aston Villa ang tan chuan insiamthat a harsa lehzual ngei ang le.

United in Champion kawng hnaih zel bawk mahse Etihad Stadium-ah City an la tum dawn avangin vawi 19 tehmeuh English Champion ni tawh hian Champion-na kalkawng hi kawng awlsam a ni lo tih chu an hre nawn leh ngei ang le.

Match Statistics
United: De Gea; Rafael, Ferdinand, Evans, Evra; Valencia, Carrick, Scholes, Young; Rooney, Welbeck. Subs – Cleverley, Nani, Hernandez, Giggs, Berbatov, Jones, Amos.
Aston Villa: Given; Hutton, Collins, Baker, Lichaj; Bannan, Gardner, Clark, Ireland; Weimann, Agbonlahor. Subs – Guzan, Johnson, Delfouneso, Heskey, N’Zogbia, Cuellar, Carruthers.