UEFA Champions League 2012/2013 khelh tan a ni leh tawh a. Group B inkhelah Arsenal chu France ah zinin French Ligue 1 champion Montpellier HSC an khel a. He inkhel hmuhnawm takah hian French champion te hi vanduai zawkah an tang a, Arsenal hi an chak hram. Montpellier HSC hian Younes Belhanda penalty goal hmangin hmahruai mahse Arsenal in Lukas Podolski leh Gervinho te goal hmangin an chhanglet.

Line Up
Montpellier HSC: Geoffrey Jourdren, Garry Bocaly, Mapou Yanga-Mbiwa (c), Hilton, Henri Bedimo, Anthony Mounier, Jamel Saihi, Remy Cabella, Marco Estrada, Younes Belhanda, Souleymane Camara
Arsenal: Vito Mannone, Carl Jenkinson, Per Mertesacker, Thomas Vermaelen (c), Kieran Gibbs, Abou Diaby, Mikel Arteta, Santi Cazorla, Gervinho, Lukas Podolski, Olivier Giroud

Inkhelh hma atangin boruak a tang a. Arsenal manager Arsene Wenger nena Strasbourg a lo khel dun tawh thin Montpellier HSC coach Rene Girard chuan an khelmualah Arsenal hi an fans te nena tangrualin hun khirhkhan tak an pek dawn thu a lo sawi a. A thleng dik ngei bawk. Arsenal in Montpellier atanga striker an lei Olivier Giroud chuan a club hlui lama goal thun ngei tumin a chungah rinna nasa tak Arsenal fans ten an nghat bawk. Hetiang boruak karah hian mipui sing thum chuang hmaah Stade de la Mosson ah inkhel tan a ni ta.

Inkhel tan anih atangin Arsenal in an tihdan thinin han inpekual mahse Montpellier defending a nghet a. Counter attack ah an innghat tih a lang. Minute 9 naah Montpellier ‘star player’ Younes Belhanda chu box chhungah Arsenal captain Thomas Vermaelen in a tihtluk avangin penalty a chawi a. Season hmasaa Ligue 1 a Eden Hazard pawhin chawimawina a lo dawn tawh ‘Ligue 1 young player of the year’ dawngtu Younes Belhanda chuan Andrea Pirlo pet thiam ang, Robin van Persie hlawhtlinpui taklohin mawizet maiin Arsenal goalkeeper Vito Mannone man theihloh turin a chip zeuh a, khelmual neitu in hma an hruai. Arsenal an insiamthaa, a hnu minute 7 naah Olivier Giroud-a ball pek tha zet mai chu Lukas Podolski in box chhungah a laa, Montpellier goal ah ‘cool’ zet maiin a ke dinglamin a pet goal a, Arsenal in goal an thun ve. Minute 2 a kal chauh tihin Montpellier inthlahdah nangchingin Arsenal in goal dang an thun lehnghal a, Carl Jenkinson a ball pek phei chu France rama football lo khel hrep tawh Gervinho chuan goal ah a lo chantir leh a, Arsenal in half time ah goal khatin hma an hruai.

Second half tan anih atangin mual neitu lamin inkhel an thunun a. Stade de la Mosson a Montpellier fans te au thawm leh hal puah ri te a ring ngei mai. Montpellier tan an captain tunhnaia France squad a koh Mapou Yanga-Mbiwa chuan tlar hnung a luah nghet ngei mai. Younes Belhanda, Remy Cabella leh Anthony Mounier te che vel chu Arsenal defender te tan a hnawk thin ngei mai. Montpellier tan Cabella in Arsenal cross bar a pet per te, Belhanda in goal ngei tura rin tawh Arsenal goalkeeper zawna a pet te kha en let se chu an insik ve nawk nawk a rinawm. Arsenal lam hi second half ah an lang tam lova, an defending erawh kum dang aiin hma an sawn tih a lang thung. UEFA in an hrem avanga a sira thut an phalsakloh manager Arsene Wenger aiawh Steve Bould chuan Arsenal defending a hrual hneh avang liau liau in an goal neihte an venghim niin a lang. Montpellier in inkhel hi a tawp thlengin thunun mahse Arsenal in an goal an venghim a, Arsenal in point 3 an hlawhchhuak.

Result dangte:
(Group A) Dinamo Zagreb 0-2 Porto (Lucho, Stefan Defour)
(Group A) PSG (Ibrahimovic, Thiago Silva, Alex, Patore) 4-1 Dynamo Kyiv (Miguel Veloso)
(Group B) Olympiacos (Abdoun) 1-2 Schalke (Howedes, Huntelaar)
(Group C) Málaga (Isco (2) Saviola) 3-0 Zenit
(Group C) Milan 0-0 Anderlecht
(Group D) Dortmund (Robert Lewandowski) 1-0 Ajax
(Group D) Real Madrid (Marcelo, Benzema, Cristiano Ronaldo) 3-2 Man. City (Dzeko, Kolarov)