Mizoram Premier League-a khel thei tur zawnna, MPL Playoff chu July 13, 2012 atanga khelh tan a ni dawn a; club pariatin Playoff hi an khel thei dawn a ni.
Club pariat inziak lutte chu Aizawl FC, Chanmari FC, Chanmari West FC, College Veng FC, FC RS Annexe, Kanan FC, Reitlang FC (Reiek), Theiriat FC (Lunglei) te an ni.

June 30 thleng khan Playoff khelh tumte hian player registration an thehlut thei a, Playoff khel thei tur tehna hrang hrang an zawm fel tih finfiahna document pawh thehlut fel tura tih a ni. July 3-ah MFA Technical Committee-in document-te a enfel a, player an ziah luhte a endik fel hnuah a chunga club pariatte hi Playoff khel thei turin a pawm fel ta a ni.

MPL-a khel thei tur hian season hmasaa First Division team pali – Dinthar FC, FC Kulikawn, Luangmual FC leh Mizoram Police te chu tling sa an ni a, anni bakah hian Playoff atanga inpet tling team paliin MPL hi an khel thei dawn a, July 28-ah heng team pali dangte hi a hriat tawh dawn a ni.

Club pariat awmte hi an inkhel kual chhuak vek dawn a, a sang pali an tling ang. Inkhelh apiangin a chak zawkin point thum hmuin an inhnehtawk chuan point khat ve ve an insem ang a, a chak loin point an hmu lo ang. Point inzat chiah an awm a nih chuan a dinhmun sang zawk tehna turin ‘head to head’ record en a ni ang a, an lo inhnehtawk a nih chuan goal difference en leh a ni ang.

Publised by Information and Publicity Sub Committee, Mizoram Foootball Association