Pathianni-a Premier League inkhel hmuhnawm takah Manchester City chuan Yaya Toure goal hnih hmangin Newcastle United 2-0 in an hneh a, kut khingkhatin Premier League trophy an vuan ta.

Ngaihven hlawh inkhel pawimawh

Sports Direct Arena-a inkhel hi Mizoram chauh ni lo, khawvel hmun hrang hranga English Premier League ngainatute chuan an ngaihven vek ti ila kan sawi sual lutuk awm lo e. He inkhel hian Newcastle United leh Manchester City chauh a nghawng lova, Premier League top six club te tan chuan eng kawng emaw takin pawimawhna a nei vek. Hmahruaitu leh champion tum Manchester City in an dinhmun sawhngheh nan chak ngei ngei an mamawh a, draw emaw chak loh chuan champion loh phah theih a ni. Newcastle United tan Champions League khelh beiseina an neih chu he game ah hian thui tak a innghat bawk.

Manchester United fans zawng zawngin Newcastle United an tan vek a, Arsenal, Tottenham Hotspurs leh Chelsea fans ten Manchester City chak turin an duh vek thung. He match hian champion tur mai bakah season leha Champions League khel pha tur a hril thei dawn a, heti taka Premier League fans ten an ngaihven rawn inkhel pawimawh hi a tam awm lo e.

Fans an inring a, players an inring a, Premier Laague round 37 a game pawimawh ber khel turin players te field chhungah an lut ta.

Team Lineups

Newcastle United: Tim Krul; Perch (Shane Ferguson 74′), Williamson, Coloccini, Santon; Tiote, Gutierrez; Ben Arfa (Shoala Amoebi 74′), Cabaye, Demba Ba; Cisse

Manchester City: Hart; Zabaleta, Kompany, Lescott, Clichy; Barry, Yaya Toure; Nasri (de Jong 62′), Silva (Richards 86′), Aguero; Tevez (Edin Dzeko 70′).

Goal awm lohna first half boruak a ṭang

Inkhel tantirah Man City in inkhel an thunun a, mahse David Silva (minute 9) leh Sergio Aguero (minute 17) te goal shot bak goal chance ṭha ti a sawi tur an nei lem lo. Newcastle United in defence ngaipawimawhin counter attack-ah an innghat a, Man City attacking players te ho kan hmu ngun hle.

Minute 33 ah dinglama Zabaleta tihsual aṭanga ball kal zel aṭangin Demba Ba leh Ben Arfa ten pet goal theihna chance an nei ve ve a, City players ten an lo dang ve ve. First half tawplamah Newcastle United an game a raw ṭha hret a, team pahnihte an innawrtawn zak zak a, goal nawr na zawk chu hmahruaitu Man City an ni zel. Minute 40 ah veilam aṭanga David Silva cross, Gareth Barry shot chu Coloccini chuan ṭha zetin a lo dang a, hemi per let hi Barry bawkin goal ah pet lehin, David Santon chuan goal line aṭangin a petchhuak. Hei hi first half-a goal chance ṭha ber a ni.

Yaya Toure: Hun pawimawhah player pawimawh

Chak mamawh ve ve an ni a, chak tum ve ve ah player nei ṭha zawk Man City bawkin second half bul an ṭan ṭha a, mual neitu zawk an nawrtawm hneh hle. Newcastle United keeper Tim Krul erawh an tibuai pha hleithei lo. Man City keeper Joe Hart phei chu hmuh tur a awm meuh lo.

Minute 62 ah Roberto Mancini chuan Nasri lachhuakin Yaya Toure chu Tevez leh Aguero te hnung chiaha awm turin a tawlhhmatir a, hei hian awmzia a nei ta. Minute 70 a ni a, Newcastle United penalty area pawnah Aguero nen an in one-two hnuin Yaya Toure chuan goal veilamah, Tim Krul banphak loh chiahin mawi em em a thun a, Sports Direct Arena-a Man City fans te an ‘sahawk’ hulh hulh a ni ber.

Goal an phurh hnuah beisei ang ngeiin Newcastle United goal nawr a na sawt a, mahse chance ṭha ber ber chu Man City tâ tho a ni. Minute 74 ah Aguero chuan keeper nen chiah an inhmachhawn tawh hnuah a pet out a, minute 81 ah Yaya Toure chuan corner aṭangin a head goal teuh hle bawk. Minute 83 ah Aguero through ball changtu Yaya Toure chuan keeper chiah a awm tawh tihah a pet goal lo a, Aguero pawhin goal ruak deuhthaw a thun ṭhelh bawk. Newcastle United in an nawr a, City counter attack an veng hneh lo ṭhin kher mai.

Newcastle United in striker pahnih Papiss Cisse leh Demba Ba te tân vawi tamtak ball kang an vawrhlut a, City defender ten an lo head khalh thei zel. Minute 89 ah City counter attack, Aguero bulṭan aṭangin Yaya Toure bawkin goal a thun leh a, hei hi veilam sir aṭanga Clichy cross a ni.

Manchester is blue

Kum 44 an nghak tawh a, tunah chuan minute 90 chiah nghah a ngai ta. He Manchester City team hi tun season-a Premier Laegue team zinga goal thun hnem ber an ni a, goal chhuah tlem ber an ni bawk. Player manto awmkhawm ringawt an ni tawh lova, world class player dahkhawmte hi an inman tawh a, tunah chuan ‘team’ tak tak an ni tawh. Manager ṭha tak an nei a, he inkhel result tidanglamtu chu Yaya Toure a sawnhma kha a ni.

Thilmak danglam bik tak a thleng a nih loh chuan Manchester City hi Premier League champion an ni ang a, Manchester City football club nena inkungkaihna nei zawng zawng, a lian ber aṭanga a te ber thlengin an hawisang larh thei ang. Chutih hunah chuan Manchester khua a pawl ang a, English Premier League title chu Manchester ah bawk a lêt leh ang a, mahse Old Trafford-ah ni lovin Etihad Stadium-ah hûn a ni tawh zawk ang.

Football-ah thilmak a thleng fo a, Manchester City hi QPR lakah an talbuai thut thei. Mahse Manchester United fans ruhkawl zingah pawh, beiseina sâng zual bik chauhin he thilmak hi an beisei ngam tawh awm e.

Statistics