Pathiannni zan inkhel hnuhnung zawkah BPL hmahruaitu Manchester City in an khingpui si hnihin an hneh tih hre ran chungin Manchester United chuan Swansea City an lo mikhual a, awlsam angreng takin 2-0 in hnehna an chang. Barclays Premier League champion tur chu season inkhel hnuhnung berah a chiang dawn chauh ta.

United beisei tinungtu inkhel

United hian champion theih beiseina beitham tak an la nei ve a, chu beiseina tinung tur chuan he inkhelah hian hnehna an chan ngei ngei mai nilovin, goal tam tak an thun a ngai a ni. Hetihlai hian Swansea erawh an beisei phak bak dinhmunah dingin season tharah BPL an khel leh thei dawn ngei a ni tih hre ran chungin Old Trafford ah an lut ang a, mahse Brendan Rogers-a naute, tun season a inkhel hmuhnawm tak min entir thintute hian awlsam taka an khingpuite hi khelhtir mai an tum bik hauh lo ang.

United lam hian inhliam nei nualin Jonny Evans leh Danny Welbeck te chuan Pogba, Anderson, Vidic leh Fletcher te zawmin hliam avangin an inkhel thei lo a ni.

Swansea City lam pawh hi an dam kim vek bik lo a, Bodde leh Orlandi te an inhliam bawk a ni.

Inkhel an tan ta…

Rinlawk ang ngeiin United lamin an tactic hman rim 4-4-2 hmangin an rawn nawr leh a, goal thun tam a ngai tih hre ran chungin phur viau mahse bul an tan fuh chiahlo a, an duh anga ball kawl theilo in Swansea lamin rang tak taka rawn nawr chang an nei nual a ni. Game a rangin a hmuhnawm viau a, mahse team pahnihte hian goal chance mumal tak an insiam thei lemlo a ni. Swansea lam zawk hian rang taka nawrlet an tum thin avangin chance an hmu leh zauh thin a, mahse hlauhawm takah an chhuah thei lemlo a, lehlamah United hian Swansea keeper Vorm chu a zawnin vawi hnih tha takin an save tir a ni.

Chutah le, minute 27 naah Valencia chuan Scholes-a ball pek tha tak mai chu a sirah tlanpuiin a kil atangin Carrick-a tan a pawt let a, Carrick chuan goal ah petin hei hi keeper hma a lo awm Scholes chuan lo thai kawi zeuhin United hmahruaina goal a thun ta a ni.

Hemi hnu hian United hi an rawn hlauhawm tual tual a, goal thun tam an mamawh tih hriain goal thun an tum hle a, mahse an “che” fuh hleithei lo thin a ni. Minute 40 naah Swansea defence tihsual zarah Valencia chuan Rooney tan chance a siamsak a, Rooney pet an lo dan per chu Ashley Young bulah tla in ani hian goal ban dinglam kilah hniamtein a pet kual lut tha hle a ni. United hian chawlhlawk hma a thunbelh leh theilo in hun a tawp a ni.

2nd half beisei pha lo chu…

2nd half lamah United hian a ngai ang bawka rawn nawr leh mai an tum a, an thei tawh bik lo.  Swansea lam an khawng ve tlat mai bakah an attacker tlanchak te an hmang tangkai thin a, United goal ah an nawr veleh thin bawk. Inkhel a rei tual tual a, Swansea dinhmun a pangngai chho hrat hrat a, United hian goal thun tumin nawr thin mahse a tira an phurna a reh a, rang tak taka goal nawr an tumna kha hmuh tur a awm tawh lo a ni. 2nd half hun chanve a liam vel tihah Carrick chuan tha lutuk maiin Rooney ball a pe lut a, mahse he England striker hian far post sirah a pet daih a ni. Minute 78na ah Berbatov-a chu Old Trafford a a inkhelh hnuhnun ber ni mai thei turah a rawn lut a, mahse a rawn langsar zui lemlo a ni.

United in an duh ber hnehna chu an chang ngei a, mahse an khelhdan leh dinhmun en chuan an lungawi a rinawm loh, an tan khua a tlai zo ta em ni ang le.

Season tawp a nghahhlelhawm ta e!!

United hian an hmelma kumhlun te um zelin points 86 ve ve hmuin an rawn nihrual leh chiah a, mahse goal difference ah goal riat ngawtin an inthlau a, mak tak maia Man City hi QPR laka an talbuai thut a an chak zo lo te anih loh chuan champion theihna kawng an nei tawh lo a ni.

Inkhel hmuhnawm tak tia sawitur nilo mahse hmuhnawm tur awmlo zawk zawk erawh a ni lemlo a, 1st half ah inkhel a rangin Modern English Football kan hmu a tih theih a, wide-play leh counter-attacking a tam em em a, mahse 2nd half lamah game thununtu zawk an inthlahdul tlat a, manager luhlul leh tihmawh tia hriatlar Sir Alex Ferguson hian an champion theih tawh loh hi a ring tak tak ta em ni ang tih zawhna pawh a siam viau thei awm e. A bet zawk ten an pawngsa nawr ngam bik silo a, team pahnihte an inhnehtawk chho viau ta a ni.

Season tawp ni ah Champion tur zawn a la ngai dawn a, kumin BPL season chu a tawp ni thlengin ngaihnawm leh hmuhnawm a tam dawn a ni. Manchester khuaah a sen lamin an beisei ngam tawh lo a ni deuh ber a, a pawl lam erawh an lam tan der tawh, mahse football chu football a ni miau a, huntawp hamrik an ham hma chu engmah hi a chianglo a ni.

Statistics