Nizan Serie A inkhel ah  derby match hmuhnawm tak kan hmu a, San Siro-ah Inter Milan chuan an hmelhma kumhlun AC Milan chu 4 – 2 in an hneh. Diego Milito  hat-trick hmang in Inter Milan hi an chak a, inkhel hi a tang in yellow card pasarih leh penalty vawi thum referee in a pe bawk. He chakna hian AC Milan champion theihna ti thamral in, Juventus hnen ah ‘chanchin tha lawmawm em em’ an va thlen a ni.

Tu te nge khel?

Inter Milan Lineup: Cesar, Zanetti, Lucio, Maicon, Samuel, Nagatomo, Sneijder ( Córdoba 84’), Alvarez (Pazzini 75’), Guarin (Obi 62’), Cambiasso, Milito.

AC Milan Lineup: Abbiati ( Amelia 35’), Nesta, Abate, Bonera ( De Sciglio 22’), Yepes, Van Bommel, Muntari (Cassano 77’), Nocerino, Boateng, Ibrahimovic, Robinho.

Inter Milan lam hian 4-3-2-1 formation rawn hmang in defender 5 an hmang a, Diego Milito chu tlar hma ah an maltlat tir a, a hnungah chiah Sneijder a awm bawk. AC Milan ve thung hian Cassano ai ah Robinho rawn luh tir in, 4-3-1-2 formation hmang in an striker pasang Ibrahimovic leh Robinho tlar hma lam ah an awm thung.

1^st half leh penalty sawisel hlawh chu:

Inkhelh tan atang hian AC Milan in bul an tan tha zawk a, an nawr hmasa ngam. Tan atanga rei vak lo ah Milan lam hian Ibrahimovic hmang in an thun thelh a,  Robinho cross tha tak chu a lo pet over hlauh. Min 14-na ah Inter lam hian Milito hmang in goal an thun hmasa a, hei hi Sneijder-a free kick fing tak atangin Walter Samuel chuan Milito tan siam sak in, vengtu neilo Milito hian chiang zet in a ti goal. Hemi hnu hian Inter lam an khel tha a, Lucio hmangin goal an thun leh telh a mahse offside an ham sak.

Milan lam hian inhliam avangin first half ah an player 2 ngawt an thlak hman. Min 42-na ah penalty sawisel hlawh tak tur chu referee Rizzoli chuan Milan a pe a, Cesar chuan Boateng  ball rawn um chu alo man sak hman mahse Boateng a tluk (dive?) vangin penalty pek ani. Ibrahimovic lo ding chhuak in Inter keeper Cesar hian tih zam a tum kher mai. A bulah te va kal in a lei ve ava chhuah khum velh! Amaherawh chu Ibrahimovic hian chiang zet in goal veilam kil lutuk ah a pet lut. Inkhel a tang nghal at a, hun tawp dawn ah Nocerino leh Cambiasso te’n yellow card hmu a, goal dang luh belh loh in chawhlawk an hmang.

2^nd half: Milan in bul tan tha, mahse..

2^nd half tan atanga reilo te ah Milan hian Ibrahimovic hmang bawk in goal an thun lehnghal a, he goal hian a thuntu class zia leh goal bula a hlauhawm zia ati chiang. Min 51-na ah Abate chuan Milito box chunga a foul avangin Inter lam in penalty an hmu ve leh, hei chu sawisel bo ani. Penalty hlawh chhuak tu Milito bawk rawn ding in a pel goal a, 2 – 2 ani ta der mai! Champion la in beisei  Milan hian nawr a ngai tih an hria a, Robinho leh Ibrahimovic tlar hma lam ah an  hlauhawm thin, mahse Julio Cesar an paltlang theilo. Inter in game an thunun tulh2 a, mahse Milan tlar hma lamah an hlauhawm zawk.

Danglamna thlentu penalty leh Maicon

Goal in pek tum in in nawr tawn zak zak mahse an ti lut hleitheilo. Min 78-na ah substitute atanga rawn lut Pazzani chuan Nesta kiu ah a tauh per a, referee in hmu chiang lo mahse assistant referee nen an in rawn hnuin a penalty a pe. Milito bawk rawn ding chhuak in, Inter goal thum na leh a hat-trick na tur goal chu a thun .  Hemi hnu hian Milan lam hian penalty an appeal ve a, mahse referee chuan a pe lo. Season 13 tawp Inter tana lo khel tu  Iván Ramiro Córdoba chu Sneijder ai a lo lut in, a home game hnuhnung ber tur a rawn khel ve.  Min 87-na ah Brazilian full-back Maicon chuan 30 yards atang goal bawn lutuk mai a thun a, a goal hi a mawiin a kawh lut kher mai, keeper tan dan ngaihna a awm bik lo. 4 – 2 ani der tawh a, Milan tan beisei tur a awm tawhlo. Hun a tawp zui a, Milan derby-ah Inter an chungnung  ta zawk a ni.

Juventus tan a thu lawmawm chu..

Inter Milan leh AC Milan an inkhelh hma hian, Juventus chu point 1 lek a Milan aia sang in, Champion tur ala sawi theih loh. Mahse Inter in Milan an hneh tih an hriat velh leh hian Juventus player leh fans te chu lawmin an zuang a, an champion tih an chian tawh vang ani. Juventus hian Cagliari chu away ah 0 -2 a hneh in, point 4 in Milan an tlansan tawh a, ti hian game khat la khelh tur awm mahse Juventus te hi pawhthalk theih an ni tawh lo a, Massimiliano Allegri leh a nau te hian kumin Scudetto an lak theihna chu a thamral ta a ni. Ti hian Juventus te hi official taka an champion zat chu vawi 28-na chiah a ni.

Inter Milan hi tunah table ah parukna an ni mek a, season thar ah Champions League ah kan hmu dawn lo a ang ta. Mahse Europa lama an beiseina chu la awm in an game hnuhnung ber ah Lazio nen in tum dawn a, an chak anih chuan Europa lama an an hmel kan hmu thei ang.