Tunhnaiah Robin van Persie leh Alex Song ten Arsenal an chhuahsan hnuin Arsenal chuan sum thahnem tak an lalut tih a chiang a. Amaherawhchu, Arsenal in an kalphung an thlak dawnlo a ang hle. Arsenal in player thar a melh a, midfielder leh defender a melh zingah hian sum tam tham tak sen an tum dawn chuanglo niin a lang.

Hun eng emaw chhung sawi a lo awm tawh a. He thu hi a takin a thleng ngei dawn ta niin a lang. Borussia Dortmund a chetthatpui hnua beiseina sang tak nena Real Madrid a lut Nuri Sahin chu Arsenal in tun season chhung an hawh thei dawn ta. Sap ram chanchinbu rinhlawh BBC lamin a ziah tawh avangin a chiang thawkhat tura ngaih a ni a. Liverpool leh Arsenal in inchuh mahse Arsenal lam hian UEFA Champions League football nen harsa takin an thlemlut thei ta niawm tak a ni. Report pakhata a inziahdan phei chuan nikuma hun chep tak kara Arsenal manager Arsene Wenger in Yossi Benayoun a sawmluh ang deuh khan tunah pawh Liverpool lamah a lut tep tihin Wenger hian Sahin hi a zuk bia niin an sawi. Liverpool hian sum lamah Sahin hi pek tamzawk inhuam mahse Arsenal lam a thlang dawn ta niin a lang a. Arsenal hian Sahin an hawhnaah hian 8 million vel chu an inseng dawn nia sawi a awm bawk.

Hetihlai hian Al Jazeera leh France a report thenkhatah Stade Rennes leh France midfielder Yann M’Vila pawh Arsenal nen an la sawizawm reng a. Tuna Alex Song hmunruak hnawhkhat tur hian M’Vila hi sawi a awm. Arsenal in tunhnaia an defender Kyle Bartley, Swansea lama an hralh hnuah kar hnih chhung an lo enchhin Georgian kum 17 mi centre back Nika Chanturia sawirik a awm a. Kar hnih chhung Arsenal hotuten an enchhin hnuah a ngheta lak ngei an duh thu sawi a awm. Arsenal in an zia an bansan theilova, naupang tha ‘tur’ lak leh hram an tum.

Hetiang anih takah chuan inhliam Jack Wilshere awmloh chhung atan Nuri Sahin hi lak an duh laiin Alex Song hmunruak hnawhkhat turin Yann M’Vila beisei a ni bawk a. Arsenal defender zinga Vermaelen, Koscielny, Mertesacker, Djourou te pui turin Chanturia hi beisei tel a ni.