Spanish club Sporting Gijon coach thin, season thar lo awm tura Villareal enkawl tura ruat Manolo Preciado chu Nilaini zing lam khan Valencia a a hotel room ah lungphu chawl in a thi a ni. Preciado hi kum 54 mi a ni.

He Spanish coach hi season thar atana Villareal enkawl turin Nilaini vek khan ruat a ni a, tun Zirtawpni hian chanchinbumite leh mipui hmaa puanzar tura tih a ni.

Manuel ‘Manolo’ Preciado Rebolledo, Manolo Preciado tia hriatlar hi football a khelhlaiin center-back position ah khel thinin a tul chuan full-back ah pawh khel thei a ni a, a khelhdan a rorum mai bakah a inkhelh apianga a inpek theih em avangin Racing Santander fans te lawm a hlawh hle thin a ni. A inkhelh chhung hian Racing Santander, Linares, Mallorca, Alaves, Ourense leh Gimnastica tan a khel hman a ni.

Football a chawlhsan hnuah coaching lamah lutin kum 3 hnuah a club hnuhnung ber Gimnastica hi a enkawl a, tichuan a thih ni thlengin club hrang hrang pakua (Villareal telin) a enkawl hman a ni.

Mizo tena kan hriatlar lemloh nimahse coach tha a ni a, a team enkawl tawhte zinga panga hi league sang zawkah a kaisanpui thei a, chung zinga pahnih chu La Liga (Spanish First Division) ah a ni nghe nghe a ni. Hetiang hre ran chhung hian Villareal club thuneitute chuan an club enkawl a, kaisanpui a, tunhma an dunhmun ang kha an thlen leh theih nan tiin an sawm ta ngei bawk a ni.

Tin, Sporting Gijon a enkawl lai hi hriat a hlawh lai ber a ni a, a chhan pahnih a awm a ni. Pakhat zawk chu 2006-2007 season a Sporting a kaisanpui mai bakah a hnua an dinhmun siam tha chho zel a, sum hman tur nei tlem ber team te zinga mi ni reng zel chunga a team te hi 14-na, 15-na te leh 2010-11 kuma 10-na a rawn nihpui thei kha a ni.

Pakhat zawk chu Real Madrid boss Jose Mourinho nena an inkhak vak tawh vang a ni. November, 2010 khan Barcelona nen an inkhelh tumin Preciado hian a starting 11 zawng zawng deuh thaw a thlak kual a, 1-0 in an chaklo ta a, hetah hian Mourinho chuan chak a tum lo hrim hrim tiin a sawisel ngawt pek a, mahse ani hi pa rorum tih takah a lo duai bik hauhlo, Mourinho chu chhanglet ve in “Mourinho hi ramsa tenawm tak ang a ni a, kan thawhpui te zinga tha lo tak a ni.” a ti ve sak a nih kha. Tin, hemi hnu hian Real Madrid chu Santiago Bernabeu ah ngei 1-0 in an va hneh zui bawk a, Mourinho record, kum kua (9) chhung Home a tlawm la neih miahloh chu an tihtawp sak nghe nghe a ni.

Hetiang zawng zawng hnu hian Mourinho nen an inkar boruak hi an siamtha leh tawh hle a, in thian tha takah an inchhuah leh nghe nghe a, Sporting in an ban hnu lawk pawhin Mourinho hian club thuneitute a sawisel nghe nghe a nih kha. Tin, hei bakah hian Villareal a enkawl hma deuh hian Mourinho coaching pek dan leh Real Madrid training dan te thlengin a va enchhin a ni.

Pa namai lo tak chu a ni ve reng reng a ni, kum 2002 khan a nupui chu cancer natna avangin a sun tawh a, tin, a kum kumleh, 2004 ah a fapa motor accident vangin a chan leh bawk a, tin, nikum mai khan a pa chu accident mak angreng takah a chan tawh bawk a ni. Heng zawng zawng karah hian tihian tiin, ” Hringnun hian min dim lo hle a, hreawm tiin ka tuar viau ila, inkahhlum hial pawh duh thei ka ni, anih loh chuan van lam enin, beiseina nena kal zelin hmasawn zel turin ka kal thei zawk a, heng zinga a hnuhnung zawk hi ka thlang ta zawk a ni.” a ti. Sporting coach atanga ban anih hnu pawhin Real Madrid leh Barcelona te va tlawhin, a va enchhinnaah pawh,” Inzir hun chhung hian tawp a neilo a ni.” tiin a lo sawi tawh bawk.

Engtinnge an sawi?

He chanchin hian Spain mai bakah football khawvel a barakhaih hle a, heti hian football khawvel mihlun thenkhatte chuan an sawi hlawm a ni.

Spain coach Vicente Calderon chuan,” Breakfast kan ei ho laiin a thihthu hian min rawn thawng hlawm a, mak kan ti hle a ni. Pa tha tak a ni a, infiammi ropui tak a ni bawk a ni. Football hi amahah hian a nung a, coaching tiropuitu a ni.” a ti a ni.

Spain leh Chelsea star Juan Mata chuan,” Han sawi tawpah chuan hriatthiam a har. A nui hmel ka mitthlaah a cham reng a ni. Mi hlim thei tak a ni a, a team enkawl tawhte ah pawh a inpekna leh a hlim theihzia hi a langchhuak thin a ni.” a ti.

Real Madrid coach Mourinho chuan club website ah tihian a ti a ni,” Mi pangngai te leh infiammi ka hriat tawhte ah chuan ka ngaihsan ang zia chu a nei vek a ni, ze nghet a nei a, a rinawm a, tin hun khirh tak pawh bei zel turin huaisenna a nei a ni.”

RCD Mallorca manager Joaquin Caparros chuan,” Villareal a zawm dawn tih ka hriat khan ka lawmpui lutuk a, a kaisanpui leh ngei pawh ka ring tlat a ni. Football coaching ah chuan ani hi sawi tel zel ngai tur khawp a ni.” a ti.

Hengte bakah hian Gijon khua a an Mayor chuan an khaw kawtthler pakhat, stadium hnai deuh ami chu “Manel Preciado” tia a hming thlak turin rawtna a thehlut nghal bawk a ni.

Football khawvel chuan mi uihawm tak a chan a ni. RIP Manolo Preciado.

Source: bbc.co.uk