MPL Playoff boruakin Local Football titi a chiah hneh hle. Round 7 chiah awm tawh mahse team pakhat (Chanmari FC) chiah an tling chiang a, team pathum (Theiriat FC, College Veng FC & Chanmari West FC) erawh an tla chiang tawh thung. Chutihrualin team pali (Aizawl FC, Reiltlang FC, Kanan FC & FC RS Annexe) te chuan hmun ruak pathum an in chuh dawn a ni. Hemi anih avang hian MPL Playoff Final Day chu local football ngainatu zawng zawngte nghahhlelh a ni a, a kara ni khat chauh tla zep pawh hi a rei a ni. Mahse a nghah nawm nan Friendly Match a awm dawn. He Friendly Match-ah hian MFA Team leh Zonet-ZoFooty Team te an in tum dawn a ni. He match hian player-te leh Coaching Staff-te leh Club Hotute boruak a ti zangkhai phak lo a nih pawhin hunawl hnawhkhahna tha tak chu a ni ngei ang le.

Tute nge khel dawn?

MFA Team
MFA Team-ah player anga tha thin an tam a, chutihrualin hruaitu ang zawnga teh chuan hruaitu tha tak tak an ni hlawm. Subroto U-17 a Mizoram Champion pui hmasa ber tute zing ami Zaihmingthanga (Zaia) leh Nation U-16 a Captain-na hnuaia Champion puitu HC Zarzoliana (Zara) te an awm a. Anni pahnih awmna hi team chhia a tih theih loh.

Amaherawhchu MFA Team atanga mipui hmuh chak tur chu Tetea Hmar (Vanglaini), Gerrard-a Pa leh Puia Pachuau te hi an ni a tih theih awm e. Anni hi media kaltlanga football tihmasawntute zingah sawi loh theih loh an ni. Anni bakah hian Mizoram Team an enkawlna hnuaia lo ti hmingtha tawh tute an awm nual a, chung zingah chuan Benjamin L. Khiangte, Vanlalngheta, T. Vanlalhluna te hi sawi hmaih chi an ni lo. Sawi vek sen an ni lo, mahse squad a awm chin hi chuan Mizoram Football hmasawn nan hian engemaw chu an thawk tih kan hriat a tha.

Zonet-ZoFooty Team

MFA lamah hming langsar an awm ang chiah Zonet-ZoFooty Team lamah pawh hming langsar an awm nual a, chung zingah chuan Mamuana (The Y2Goal), Hmingsanga (Lengzem) leh Ruata (Fanzone) te hi a langsar zual a tih theih awm e. Hmingsanga leh Mamuana te hi naupan lai atanga inkawm thin an ni a, Hmingsanga sawi dan chuan, “Mamuana hi goal thun thei tak a ni”. A sawi hi a dik a rinawm a, chutihrualin tun friendly-ah hian goal a thun lo anih pawhin football chu a hre hneh hle a ni tih chu kan pawm tlan a rinawm. Ruata hi Red Ribbon 2012 Finalist Durtlang Captain kha a ni a. Ani aia ball pet na hi Mizo zingah hian an tam bik awm lo e.

Football hi pathum chiah a khelh tur anih loh ang ngeiin he squad hi a chak ru fu a, tun MPL Playoff hlawhtlinna atana thawh hlawk tak Tato-a te hi football tui a ni satliah lova, football thiam a ni. Delhi Mizo zingah chuan a thatzia hi sawi nawn a ngai lovang. Heng bakah hian Ruatsaka, Anuna, Zama, Ahruaia te hi an awmna lai tura an awm chuan an tal hiar thei viau bawk ang.

I-Day Celebration Football Tournament Tie Draw

He Friendly Match hma hian Tie Draw neih a ni dawn a, football club enkawltute tan chuan he hun hi a nghahhlelhawm ngei ang. I-Day-ah hian team 10 an awm dawn a, Group 2-ah then tur niin Group Match hi Round Robin League a khelh tur a ni.

I-Day-ah hian India ram club tha ONGC (Mumbai) bakah Oil India ten an rawn khel dawn a. Anni bakah hian MPL team pariat ten an khel dawn a ni. Club hruaitute tan chuan an fixtures sawiho pahin he Friendly Match en hi a rem phian thei bawk.

A Tawp Nan

Inkhel quality ang zawnga thlir chuan inkhel hmuhnawm tak a ni lo ang. Mahse thlir dan danga thlir chuan inkhel hmuhnawm tak a ni thei bawk. Hetiang inkhel en tur hi a van tawh dawn avangin, hun i neih a, i hman bawk chuan Lammual pan a fuh ang. School Naupang form ha tan chauh a free tawh lova, mi zawng zawng tan a free dawn a ni.

Squad:
MFA Team

Coaching Staff:
Coach: T. Vanlalhluna (Bahhluna)
Manager: Tuikhuahthanga (Tk-a)
Asst. Manager: Vanlaltluanga (Tluangtea) & Lalduhthlanga (Valte-a)
Physio : R. Lalnunsangi (Manuni) & Lallawmsanga (Malawma)

ZONET-ZOFOOTY TEAM
1. Mamuana (The Y2Goal)
2. Hmingsanga (Lengzem)
3. Ruata (Fanzone)
4. Tato-a
5. Mapuia
6. Ruatsaka
7. Anuna
8. Rengpuia
9. Hriatpuia
10. Ahruaia
11. Zama
12. Zara
13. RS-a
14. Mike
15. Jeremy
16. Victor
17. Valtea
18. P. Moia