MSU-Oil India Cup Semifinal hmasa zawkah Govt. Aizawl College (GAC) leh Hrangbana College (HBC) te an inkhel dawn a. Semifinal hnuhnung zawkah Govt Aizawl North College leh Govt. Johnson College-te an inkhel thung dawn a ni. SemiFinal hmasa zawk hi chhun dar 12 a khelh tur ni mahse a boruak a nep phah dawn chuang lova, College lian ve ve inkhel tur anih avangin final atan a itawm hle. GAC hian Inter-College Football Tournament hnuhnung ber Champhaia neiah khan HBC hi 3-1 in an lo hneh tawh a, tun tumah hian an hneh leh thei angem? tih hi zawhna lian tak a ni.

SemiFinal Kalkawng!
Govt. Aizawl College hi an bye avangin first round an khel lova, Quarterfinal-ah Govt. T. Romana college 4-0 a hnehin SemiFinal an lut a, Hrangbana college hian first Round-ah Govt. Kolasib college 11-1 in an sawp a, Quarterfinal-ah Aizawl West College 6-0 a sawp lehin semifinal an lut ve bawk. Awlsam takin Semifinal an lut ve ve a, final erawh harsa taka an luh ngei a ngai tawh ang.

Players to Watch:

Michael Lalremruata (GAC)
Michael-a hi Aizawl F.C. Striker chhuanvawr kha a ni a. Field pawn lamah chuan tawng tam lo tak leh mi hnawksak lo tak ni mahse field chhungah chuan a tumpuite tan mi hnawksak em em mai a ni thung. Goal a thun thei em em a, a taksa lenna hi a hmang thiam a, ball a pet na em em bawk. Hrangbana College defender te tan chuan ven uluk a ngai khawp ang le.

R. Lalrammawia (GAC)
Rammawia hi Aizawl F.C. player tho a ni a. Palian ni lo mahse ball a pet thiam avang leh a game fin em avangin GAC player hlauhawm ber pakhat a ni ang. College tournament bakah club football lamah pawh experience a nei ṭha tawh a, chumai bakah left footer anih bawk avangin player special tak hi chu a ni hrim hrim awm e.

H. Lalremruata (GAC)
Remruata hi SYS Player a ni thung a. Season tan tirh lamah third keeper angin SYS-ah awm mahse season a tawp dawn meuh chuan MFA Cup best keeper a nih theih atang ringawt pawh hian a chhiat loh dan tur chu kan hrethiam mai awm e. A movement dik piah lamah technique a nei tha a, chumi belhchhah tur chuan a pumrua a lian tha bawk. Mizoram keeper ni thei tur khawpa tha a ni.

PC Lalnunsiama (GAC)
Nuna hi 3rd Bn MAP player a ni thung a. Police-ah hian a nghetin la awm lo mahse field chhungah chuan a nghet em em thung. Experience a neih that tawh avangin game a man chak em em a, a physical a that bawk avangin Mizoram First Division level-ah pawh defensive midfielder tha ber pawla ngaih a ni. Mahse Quarter final kha inhliam vangin a khel thei lova. SemiFinal-ah erawh a khelh theih tawh ngei a beiseiawm.

MS Dawngliana (HBC)
Dawngtea hi striker goal khung thei tak a ni a. Mizo zingah pawh palian lo pawl tak ni mahse game awmzia a hre em em a, awmna tur taka a awm thin avang leh a ball chan a hloh mai mai ngai loh avangin field chhungah a te tih a hriat meuh lo. Dawngtea hi Red Ribbon 2012 final a Man of the Match leh chakna goal khungtu kha a ni.

Rochhingpuia (HBC)
Chhinga hi chu hriatloh chi a ni lova. Red Ribbon 2012 Best Player kha a ni. A len that avangin lehlam pawl tan a hnawksak a. Mi ball chanlai a chhuhsak theih mai piahlamah ball kangah a tha tel bawk a. Tun dinhmunah chuan Mizorama defensive midfielder tha ber te zingah chhiar tel loh chi a ni lo. Team tana a inpekna hi a hlu. Player thiam an tih ang chi chu a ni tehmeuh a, mahse player tha an tih ang chi hi a ni zawk mah awm e.

R. Malsawmtluanga (HBC)
MS-a hi pawh hi local football ngaina tan chuan hriat loh chi a ni lo ang. I-Day 2011 a Aizawl F.C. inghahna pakhat a ni a, Red Ribbon 2011 a Durtlang Champion puitu anih bakah Best Player a ni bawk. Pa lian tak ni lo mahse a game a fing em em a, field chhungah a talbuai ngai lova. Ball a thiam a piahlamah Ball pet a thiam bawk. HBC chak leh chakloh chu MS-a khelhthat leh thatlovah thui tak a inghat a tih theih awm e.

Christoher Lalhruaitluanga (HBC)
Chris-a hi Luangmual Player a ni thung. Player ball thiam tak ni mahse a fitness a that tawk thin loh avangin a nih tur angin a lang chhuak thei thin lo. I-Day 2011 ah khan Luangmual tan a kheltha hle a. 3rd Bn MAP lama hun tawp dawna a goal thun avangin SemiFinal an luh phah a, Aizawl F.C. an tlak phah bawk a nih kha.

Fans Vs Fans

College tournament ti hmuhnawmtu chu fans te an ni ṭhin a, semi final ah pawh hian a danglam dawn chuang lo. Aizawl College in an au hla nalh leh dangdai tak tak hmangin Hrangbana College an au el anga, Hrangbana College pawn an au el na chhang let turin au hla an nei bawk ang. Naktuk lam hi chu boruak a tan dawn avangin an College a lo lut tawh ṭhinte thlengin an fuankhawm dawn a, chuvangin Police duty pawh an that viau a rinawm. Boruak duhawm lo a thlen em chu a rinawm loh chungin fans te hian an college an chak lo anih chuan an tuar thiam a rinawm loh. Chuvang chuan naktukah chuan fans te hi a hmuhnawm ber te zing ami an ni ngei ang le.

Squad:

Govt. Aizawl College (GAC)
PC Vanlalmuanawma, R. Lalrammawia, Lalramliana, B. Lalramdinpuia, Lalthantluanga, C. Lallianzuala, Johny Zosangliana, Zohmingthanga, James Lalrammuanawma, John Lalsangliana, Lalrintluanga, Lalnunenga, Brandon V. L Remdika, C. Ramdinmawia, Michael Lalremruata, H. Lalremruata, PC. Lalnunsiama, PL Rohlupuia, Lalmalsawma, Lalrinzuala.

Hrangbana College (HBC)
Rochhingpuia, Lalremsiama Khiangte, Lalsangzuala, R. Malsawmtluanga, Christopher Lalhruaitluanga, Lalhmangaiha, Lalfakawm, MS Dawngliana, R. Lalhmingsanga, Sanghnuna Chhangte, H. Lalchhanchhuaha, Lalhruaitluanga, Lalnunsanga, C. Lalmalsawma, Laldingliana, Daniel Lalawmpuia, John Vanlalchhuanga, Lalrinchhana, Michael Lalhruaitluanga, Jerry Zohmingsanga.