He thupui i hmuh thut hian i awih lo ve tho maithei. I awih a nih pawn mak i tih ve ngei ka ring. Newcastle United midfielder Joey Barton chuan free transfer in Queens Park Rangers a zawmfel ta. Jersey no 17 a ha ang.

Kum 28 a upa Barton hian Ningani khan medical test a paltlang a, QPR ah hian kum 4 chhung contract a ziak a ni. A hlawh zat tur vel hi an la puangzar lo a, a remchan dan angin update zel kan lo tum ang.

Newcastle United in star players Andy Caroll, Luis Enrique leh Kevin Nolan te an hralh avangin a thinrimna Twitter lamah a hrithla a, a club chu hmasawn tum lo ni ah a chhuah. Hei vang hian club lamin pawisa an chawitir a, free transfer a chhuak thei turin an dah a ni. Newcastle duh loh chu kaithar QPR lawm ah a tla ta a ni ber mai.

QPR stadium Loftus Road ah Zirtawpni khan Barton hi phochhuah a ni.

QPR teh daih

Barton chuan QPR website ah thuchhuah siamin, “He club ah hian chona thar ka hmachhawn dawn a ni. Tunah hian player ṭha tak tak an awm sa tawh a, Championship ah pawh season ropui tak an khel a nih kha. Manager in player pahnih pathum vel leibelh a la tum a, club neitute tum a sâng a, he club hmalam hun hi a eng hle a ni.” a ti.

Manager Warnock pawh a phúr a, “He hmunah hian engnge a tih theih tih lantir turin a lo kal a ni. England team a khelhphak leh a duh a, a phur em em a ni. Sawiselna a tawk zeuh zeuh a, mahse heng hi chu ka khelh ve lai pawhin ka tawk ve tho a ni. Chak duh reng mi a ni a, a theihna leh a thiamna te hi a ṭha thei ang bera a hman theih nan kan thawkho dawn a ni.” tiin a player lei thar chu a chhan lâwk.

QPR hi Air Asia in an lei tawh a, Barton hi ‘takeover’ hnua QPR player thar hmasa ber a ni.

Manchester United, Arsenal leh Tottenham te nen sawizawm a ni hman a, QPR lama a kal teh daih hian a fans te a barakhaih ve viau awm e. Club lian ho hian an lo duh tak tak lo em ni? QPR ah hian a hlawh hnem dawn em ni? Club lian vak lo QPR tan Barton enkawl hi a buaithlak viau angem? Zawhna dang tam tak a awm thei ang a, thil chiang sa erawh chu, field chhungah chuan QPR hian an ṭhatpui dawn tih hi a ni. He transfer hian boruak a la nei dawn chauh e.