Pathianni zanah Manchester City chuan khualmualah Wolverhampton Wanderers chu Sergio Aguero leh Samir Nasri goal hmangin 2-0 in an hneh a, pakhatna Manchester United nen an inthlauhna point 3 chauh a ni ta. Man United leh Man City te hi an la intum dawn avang leh, Man City hi goal difference ah an ṭhat zawk avangin Premier League title race ah Manchester City dinhmun a ṭha kher mai.

Inkhelh hma dinhmun

Manchester United in point 2 an hloh tih hresa-a inkhel an ni bawk a, champion tum Manchester City in chak an mamawh a, tlak hlau Wolves phei chuan an mamawh lehzual. Manchester City hi an chak zo lo a nih chuan champion beiseina an nei chau tawh viau ang a, an chak a nih erawh chuan Manchester United aiin an dinhmun a ṭha zawk thung ang. Wolves hi tlachiang tawh ang deuhthaw an ni a, an draw emaw, an chak lo a nih chuan season tharah Premier League ah kan hmu tawh lo ang. Team pahnihte tan he match a pawimawhzia chu a chiang mai awm e.

Team Lineups: 

Wolves: De Vries; Foley, Stearman, Bassong (Berra 75′), Ward; Kightly, Henry, Davis, Jarvis; Edwards (Kevin Doyle 61′); Fletcher (Ebanks-Blake 77′).

Man City: Hart; Zabaleta, Kompany, Lescott, Clichy; Yaya Toure, Barry; David Silva (de Jong 59′), Nasri (Kolo Toure 86′); Tevez (Johnson 75′), Aguero.

First half a hmuhnawm lo

Inkhelh ṭan aṭanga second 16 lekah Carlos Tevez chuan goal shot a nei nghal pang. Hemi hnu hian team pahnihten chance ṭha an nei nual a, Aguero leh Nasri ten City tân an thun teuh hle a, Wolves tân Sebastian Bassong leh Davis a hlauhawm viau bawk. An inkhel rei a, Man City in ball an chang tam chhunzawm a, goal chance pawh an ngah zawk. A mawngphaha awm Wolves players ten City ‘stars’ te an khan lo deuh a ni.

Minute 27 ah veilam aṭanga Gael Clichy diagonal through ball ṭha zet chu Wolves defender ten an khawih pha lova, Sergio Aguero chuan lo changin a pet goal zui. Goal a luh hnu hian inkhel a zuai chhunzawm a, Wolves attacking move in City defender te a thleng zo mang lova, City attack pawh a hlauhawm chhunzawm chuang lo. First half-ah goal dang luhbelh lo in team pahnihte an inṭhen.

Hun pawimawhah team ṭha an hriat

Second half-ah Wolves an khel ṭha sawt a, hun engemawchen chu City an nawrbet. Premier League mawngphaha awm tih hriat loh khawpin an passing a mawi ṭhin a, mahse City keeper Joe Hart tân harsatna an siam tam lem lo. Wolves innghahna Matt Jarvis leh Steven Fletcher te an hlauhawm tluantling thei lo a ni ber e. Hunrei tak chhung chu Manchester City in nidang an pha lo a, midfield a pherh a, Tevez leh Aguero pawh an lang tam lo.

Mahse Manchester City chu Manchester City an lo ni nge nge a, an pet goal a beiseiawm loh lai berin goal pawimawh an thun. Minute 74 ah Tevez chuan centre bulah freekick a hlawhchhuak a. He freekick hi rang taka petin, Clichy nen an in one-two hnuah Wolves goal bulah a khalh a, penalty box pawna free taka awm Nasri pe pheiin, a ni hian awlsam zetin a lo pet goal. Nasri hnaihchilh theitu tur ber Wolves defender Bassong chu a rawn tlanletna lamah a hamstring a tina a, Nasri hian free takin a pet goal theih phah ta a ni.

Wolves hian a tawplamah han nawr ve leh deuh mahse Man City in inkhel an thunun tawh a, counter attack ah vawi duai lo goal thun theihna chance ṭha an insiam. Aguero, Nasri, Yaya Toure ten chance an nei deuh mawlh mawlh a, goal erawh a luhbelh tawh lo. Wolves hian khelh ṭhat deuh lai nei mahse Manchester City hi chak loh hlauhawmin an awm ngai lo a, City defender ten Wolves attack zawng zawng deuhthaw an dangchat thei a, an chhuah chhun pawh Joe Hart tan hlauhawm lutuk a awm lem lo a ni.

Manchester City dinhmun a ṭha

Hmanni lawk kha chuan Premier League-ah Manchester United in point 8 in hma an hruai a, Manchester City tân beisei tur a tlem tawh a, Roberto Mancini meuh pawhin ‘title race’ a zawh tawh thu a sawi a nih kha. Mahse tunah chuan an inthlauhna hi point 3 chauh a ni leh tawh a. An khelh tur la awm pathumah Manchester City an chak vek chuan an champion ang. Manchester United result ah an innghat tawh lova, an champion leh champion loh chu an kutah a innghat leh ta.

April ni 30 (Thawhṭan zanrei) ah Etihad stadium-ah Manchester derby a awm dawn a, club pahnihte tân he match pawimawhzia hi ziahchhuah hleihtheih pawh a ni lo. Premier League ‘FINAL’ tih loh phal rual a ni lo. He match ah hian Man City an chak chuan United nen an point hmuh zat a inang ang a, goal difference ah an ṭhat zawk avangin City in hma an hruai chhunzawm ang. United hi an chak emaw, an indraw emaw a nih chuan City tân umphak a har fat thung ang.

Premier League-a an intum hnuhnun ber chuan Old Trafford-ah City 6-1 in an chak a, Community Shield leh FA Cup ah Man United hi 3-2 ve ve in an chak thung. Manchester City hian an game hnuhnung 3 ah goal 12 an thun tawh a, goal 1 chiah an chhuah thung. Manager, players leh fans te an phûr thar leh tawh a, Manchester City hi an champion lo ang tih a sawi theih ta lo.

Manchester derby bakah hian Newcastle (away) leh QPR (home) an la nei bawk a ni.

Goodbye Wolves

Premier League a team chhe pawl ni chung sia game hmuhnawm tak min entir ṭhintu Wolverhampton Wanderers hi season lehah chuan Premier League-ah hmuh tur an awm tawh dawn lo. Kum 2009/10 season khan Premier League ah rawn kai tharin, manager ‘pa’ tak Mick McCarthy enkawlna hnuaiah attacking game hmuhnawm tak min entir a. Club lian an tum pawhin an nawr ngam ve zel a, club lian hneh nulh chang an neih ṭhin avangin neutral tamtakin an ṭan phah a ni. Hemi kum hian Premier League ah 15 na an ni nghe nghe.

Kum 2010/11 season ah 17 na niin vanneih vang liau liauin Premier League ah an inhamtang a, tun season ah manager Mick McCarthy bânin a assistant Terry Connor chuan a enkawl zui a. Mahse he team hi a chhanchhuak zo ta bik lo a ni. Tunah hian point 23 an hmu mek a, 17 na Wigan in point 34 an hmuh tawh avangin Wolves tân Premier League-a inchelhbeh ngaihna a awm tawh lo.

Engpawhnise, a pawimawh ber chu Manchester City in Manchester United point 3 chauhin an pha lo tawh hi a ni. Tu zawk nge champion tura in rin le?